Խորքային քննություն պիտի տարվի, պարզվի` ինչ է եղել հրդեհից առաջ. Նորիկյան․ ՏԵՍԱՆՅՈՒԹ

Ազատ գյուղի զորամասի կացարանում մահացած զինծառայողների ծնողների կողմից Կառավարությունում տեղի ունեցած հանդիպմանը համապարփակ ներկայացվել է համապատասխան պաշտոնյաներին իրենց պահանջներ, վերջիններիս կողմից խոստացվել է ներկայացնել տեղեկատվության հանդիպման հնարավորության մասին: Այս մասին այսօր ՊՆ-ի դիմաց ակցիայի ժամանակ լրագրողների հետ զրույցում հայտնեց 15 զոհված զինծառայողներից 14-ի ծնողների պահերի պաշտպան Նորայր Նորիկյանը:

Նրա խոսքով՝ ծնողների խիստ անվստահությունը այս վարույթի նկատմամբ առկա է, այդ անվստահությունն ու կասկածանքը ծնվել է հունվարի 19-ից սկսած, երբ կառավարության նիստում և իրավասու պաշտոնյաների կողմից հնչել են հակասական հայտարարություններ։

«Ծնողները շատ հիմնավորված հարցեր են բարձրացնում: Ես ակնկալում եմ, որ այս գործով քննության առարկա դարձվեն հնարավոր բոլոր վարկածները: Օրինակ՝ սպանության վարկած, դիտավորությամբ կյանքից զրկելու վարկած, թունավորման վարկած, դիվերսիայի վարկած և տարբեր այլ վարկածներ:

Եթե մենք համադրում ենք հրապարակված տեղեկությունները, ստանում ենք բացասական պատկեր: Եթե վերլուծում ենք կապիտանի կողմից հրապարակ բերված ցուցմունքները, ակնհայտ է դառնում, որ հրդեհի բռնկման պահից մինչև 15-20 րոպե տևողությամբ ժամանակահատվածը բավարար էր, որ զինծառայողները դուրս գային տարածքից: Բայց ակնհայտ է, որ զինվորները ոչ մի գործողություն չեն կատարել: Դա հնարավորություն է տալիս արձանագրելու, որ զինվորները պարզապես կենդանի չեն եղել, հակառակ դեպքում ողջամիտ քայլեր կձեռնարկեին այդ տարածքից դուրս գալու համար։

Պետք է պատասխանել հետևյալ հարցին. հրդեհը հետևա՞նք է ինչ-որ հետքեր թաքցնելու, թե՞ անփույթ գործընթաց է: Պետք է պարզել, թե որն է զինվորների մահվան պատճառը։

Առկա տեղեկավությունը մեզ թույլ է տալիս չվստահելու ներկայացված վարկածին, որ երեխաները մահացել են հրդեհի պատճառով»,- նշեց իրավապաշտպանը:

«Խորքային քննություն պիտի տարվի, պարզվի` ինչ է եղել հրդեհից առաջ»,- ընդգծեց Նորիկյանը։

Մանրամասները՝ տեսանյութում։