Թուրքական իշխանամետ պարբերականների երկու սյունակագիրներ հայտնում են, որ Թուրքիայի նախագահ Ռեջեփ Թայիփ Էրդողանը հակված է ընտրություններն անցկացնել մայիսի 14-ին՝ չնայած երկրում տեղի ունեցած հզոր երկրաշարժերին, գրում է Gercek News-ը։
««Արդարություն և զարգացում» կուսակցությունում ընտրությունների հետ կապված բոլոր տարբերակները սեղանին են շ, սակայն այս պահին ո՛չ որոշում կա, ո՛չ էլ հակվածություն դրանք հետաձգելու։ Կարող եմ ասել, որ նախագահ Էրդողանը կողմ է ընտրությունները մայիսի 14-ին անցկացնելուն, մինչ կուսակցության որոշ դեմքեր պաշտպանում են ընտրությունները հունիսի 18-ին անցկացնելու տարբերակը։ Նախագահ Էրդողանը չի անհանգստանում ընտրությունների համար։ Գերագույն ընտրական հանձնաժողովն աշխատանքներ է տանելու, որ նրանք, ովքեր երկրաշարժի հետևանքով տեղափոխվել են կամ մարդիկ, որոնք մնացել են երկրաշարժի գոտում, կարողանան քվեարկել»,- Hurriyet-ում գրել է սյունակագիր Հանդե Ֆիրաթը։
Իշխող «Արդարություն և զարգացում» կուսակցության (AKP) համահիմնադիր Բյուլենթ Արընչը բանավեճ է հրահրել, երբ հայտարարել է, որ ընտրությունները պետք է հետաձգվեն երկրաշարժի պատճառով։
Ընտրությունները ժամանակին անցկացնելու օգտին հանդես է եկել նաև իշխանամետ լրագրող Մեհմեդ Բարլասը։
«ԱԶԿ-ի անդամները պետք է հաշվի առնեն Արընչի կոչը։ Նա երբեք նման կոչ չէր անի, եթե մտածեր, որ դա հօգուտ իշխող դաշինքի կլինի: Եթե Արընչն ասի՝ «հետաձգիր», լավ կլինի հակառակն անել»,- ասել է լրագրողը։
Էմմա Չոբանյան
