Հայհոյանքների մեջ փորձել ենք տեսնել` ինչ ռացիոնալ բան կա. Փաշինյանը` ակադեմիական քաղաքի ստեղծման մասին․ ՏԵՍԱՆՅՈՒԹ

Կառավարությունը 240 միլիոն 542 հազար դրամ տրամադրեց ԿԳՄՍ նախարարությանը՝ Հայ կինոյի հիմնադրման 100-ամյա հոբելյանական միջոցառումների պատշաճ կազմակերպման և անխափան իրականացման նպատակով:

«2023 թվականին լրանում է Հայ կինոյի հիմնադրման 100-ամյակը: Կինոյի հիմնադրումը եղել է խոշորագույն մշակութային իրադարձություն, որով մենք էլ ներգրավվել ենք համաշխարհային գեղարվեստական պրոցեսների մեջ:

Այս համատեքստում, ինչպես նաև Հայ կինոյի հիմնադիր Համո Բեկնազարյանի 30-ամյա հոբելյանի շրջանակում այս տարի առաջին անգամ ԿԳՄՍ նախաձեռնությամբ հրատարակվել է ռեժիսորին նվիրված եռալեզու պատկերագիրքը, որի շնորհանդեսն արդեն եղել է:

2022 թվականին Հայ կինոյի 100-ամյակն ընդգրկվել է ՅՈՒՆԵՍԿՕ-ի «Հռչակավոր մարդկանց և հիշարժան տարեթվերի օրացույցում», որից հետո վարչապետի որոշմամբ ձևավորվել է հոբելյանական հանձնաժողով, այն արդեն իրականացրել է միջոցառումների ծրագրերը կազմելու աշխատանքները»,- ասաց ԿԳՄՍ նախարար Ժաննա Անդրեասյանը:

նախարարի խոսքով՝ իրականացվելու է «Հայկական կինոդար» ծրագիրը, որը մեկնարկելու է ապրիլի 16-ից և տևելու է շուրջ 1 տարի: Հայկական դասական և ժամանակակից ֆիլմեր ցուցադրվելու են մարզերում և Երևանում: Դրանք ուղեկցվելու են քննարկումներով:

Կինոդպրոց է բացվելու Դեբետում, որտեղ 12-16 տարեկան երեխաներն անցնելու են կինոյի պատմություն, սցենարի վարպետություն և նմանատիպ առարկաներ։

Անցկացվելու է նաև անիմացիոն ֆիլմերի շաբաթ:

Վարչապետ Նիկոլ Փաշինյանը հավելեց, որ կինոյի հարյուրամյակը կարևոր իրադարձություն է և պետք է ընկալել որպես անկյունաքար հետագա ռազմավարական ծրագրերն իրականացնելու ճանապարհին:
«Արդեն քննարկվում է «Հայֆիլմ» կինոստուդիայի ապագան և ճակատագիրը, և մենք, կարծում եմ, շատ մոտ ենք ռազմավարական որոշում կայացնելուն և այդ տարածքում կունենանք արվեստների ավագ դպրոց, արվեստների համալսարան, և սա ծրագրի մի հատվածն է, որը կզարգանա և կհասնի Աշտարակի ֆիզիկայի ինստիտուտի տարածք»,- նշեց Փաշինյանը։

Վարչապետն անդրադարձավ նաև ակադեմիական քաղաքի նախագծին և նշեց, որ երկար են մտածել այս հարցի շուրջ․ «Աշխատել ենք ուշադիր լսել բոլոր քննադատությունները, նույնիսկ հայհոյանքների մեջ փորձել ենք տեսնել, թե ինչ ռացիոնալ բան կա, և կարծում եմ, որ շատ բնական ճանապարհով եկել ենք այս որոշմանը, որ ակադեմիական քաղաքը մեր ապագան կանխորոշող ամենակարևոր ծրագրերից մեկն է և մենք հետևողականորեն պետք է այդ ծրագիրն իրականացնենք: Որքան էլ դժվար լինի տեխնիկական, ֆինանսական առումով, մենք պետք է պարտադիր անենք, և այս առումով մեր քաղաքական կամքը այս ընթացքում ավելի ու ավելի ամրացել է, և սա շատ մանրամասն քննարկել և ծանր ու թեթև ենք արել»։

Մանրամասները՝ տեսանյութում։