Առողջության համապարփակ ապահովագրության փաթեթը ներառելու է սկրինինգային ծրագրերը, կանխարգելիչ միջոցառումները, տարեկան պարտադիր հետազոտությունները, նաև վիրահատական միջոցառումներ։ Այսօր լրագրողների հետ հանդիպմանն այս մասին հայտարարեց ՀՀ առողջապահության նախարար Անահիտ Ավանեսյանը:
Սակայն, նախարարի խոսքով, ապահովագրության համակարգը ամեն ինչ չի փակելու։
«Թանկարժեք վիրահատությունների համար այսօր էլ մեծամասամբ ամբողջական վճարում չի կատարվում պետության կողմից, այլ այգ գումարի մի մասն է վճարվում։
Մեր նպատակն է, որ պետական պատվերը վերածվի ապահովագրական փաթեթի՝ ավելի լայն ծառայություններով, բայց կմնան այնպիսի վիրահատություններ, օրինակ՝ պլաստիկ վիրահատությունները, որոնք չեն ներառվի ապահովագրական փաթեթի շրջանակներում։ Դրանք կիրականացվեն վճարների հիման վրա»,-նշեց Ավանեսյանը։
Նախարարը նաև ընդգծեց, որ ապահովագրական համակարգերը կարող են կայուն լինել, եթե բուժման նկատմամբ մոտեցումները ստանդարտացված են։
Ավանեսյանը վստահեցրեց, որ այս տարվա ընթացքում մոտավորապես 300 գործելակարգեր պետք է մշակվեն, որոնք կդառնան պարտադիր կիրառելի բժշկական կենտրոնների համար, և բուժառուների բուժման սխեման կլինի նույնական՝ ընդունված ուղեցույցերի համապատասխան։
Մանրամասները՝ տեսանյութում։
