16.09.2026 | 00:14
Կռվախնձոր դարձած դուռն ու արտահերթ ընտրությունների նախերգանքը․ Գյումրիի ավագանու նիստը լարվեց. ՏԵՍԱՆՅՈՒԹ
ՌԴ-ն հայտարարում էր խաղաղ բանակցությունների մասին՝ փորձելով հետաձգել Ուկրաինային տանկերի մատակարարումը․ ISW
Քաղաքականություն
13.02.2023 | 22:56
Պատերազմի ուսումնասիրության ամերիկյան ինստիտուտը (ISW) իր վերջին զեկույցը նվիրել է ռուսական տեղեկատվական գործողությունների վերլուծությանը, որոնք նախատեսված են ռազմաճակատում Մոսկվայի որոշակի նպատակներին աջակցելու կամ ռազմական պարտությունների հետևանքները մեղմելու համար, գրում է BBC-ի ռուսական ծառայությունը։
Ինստիտուտի փորձագետների կարծիքով՝ Ռուսաստանը, հնարավոր է, «կրկին գաղտնի տեղեկատվական արշավներ իրականացնի», որոնց մի մասն ուղղված է Ուկրաինային արևմտյան ռազմական օգնությունը խափանելուն կամ դանդաղեցնելուն:
Նշվում է, որ Ռուսաստանի բազմաթիվ հայտարարությունները 2022 թվականի սեպտեմբեր-նոյեմբեր ամիսներին միջուկային էսկալացիայի վտանգի մասին անհրաժեշտ էին՝ «Արևմուտքին համոզելու Ուկրաինային ռազմական օգնության մատակարարումը դադարեցնելու անհրաժեշտության մասին, որը նրան անհրաժեշտ էր Խարկովի մարզում ռուսական զորքերի կրած ջախջախիչ պարտություններից հետո հակահարձակումները շարունակելու համար»: Միջուկային հռետորաբանությունը նաև սկսեց ավելանալ ՌԴ նախագահ Վլադիմիր Պուտինի՝ մոբիլիզացիա սկսելու որոշումից հետո, ինչը նրան բարդ դրության մեջ դրեց՝ ինչպես միջազգային հարթակում, այնպես էլ երկրի ներսում։
Ինստիտուտի մասնագետների կարծիքով՝ «այժմ պարզ է, որ խաղաղության բանակցությունների շուրջ ռուսական տեղեկատվական արշավը, որը հատկապես ինտենսիվ դարձավ 2022 թվականի դեկտեմբերին, նպատակ ուներ նաև հետաձգել արևմտյան տանկերի և այլ առաջադեմ սարքավորումների մատակարարումը, որոնք անհրաժեշտ են ուկրաինական հակահարձակումները շարունակելու համար»։ Դա անհրաժեշտ էր Մոսկվայի սեփական հարձակողական ծրագրերի համար հիմք ստեղծելու նպատակով։ Մոսկվան շարունակում է պնդումներն այն մասին, որ Ուկրաինան մտադիր է սպառնալ Ռուսաստանին հեռահար զենքերով և տանկերով, այլ ոչ թե նման զենքով ազատագրել սեփական տարածքը:
«Ռուսաստանը շարունակելու է օգտագործել տեղեկատվական գործողությունները որպես զենք՝ ուղղակիորեն աջակցելու Ուկրաինայում գաղտնի ռազմական գործողություններին, հատկապես այն բանից հետո, երբ նրան հաջողվեց վերականգնել նախաձեռնությունը Արևելյան Ուկրաինայի ճակատում»,- եզրակացնում են ISW-ի փորձագետները:
Միաժամանակ, նրանց կարծիքով, Կրեմլը մշտապես ուռճացնում է Բախմուտի շուրջ իր հաջողությունների կարևորությունը, սակայն «նման տեղեկատվական գործողությունների արդյունավետությունը նվազում է, քանի որ թե՛ Ուկրաինան, թե՛ պատերազմին աջակցող ռուս ազգայնականներն այլևս այնքան էլ հակված չեն ընդունել ռուսական մոտալուտ հաղթանակի մասին պնդումները»։
«Պատճառը մեկ տարին է, որի ընթացքում Ռուսաստանը ցուցաբերել է ռազմական ոչ կոմպետենտություն»,- նշում են ինստիտուտի փորձագետները։
Էմմա Չոբանյան
