13.09.2026 | 20:00
Ո՞վ կարող է տուն առնել Երևանում․ անշարժ գույքի շուկայի «անհասանելի» ՇԵՐՏԵՐԸ․ ՏԵՍԱՆՅՈՒԹ
Վրացական դատարանը չի հավատում, որ Սաակաշվիլին ծանր հիվանդ է
Քաղաքականություն
07.02.2023 | 14:19
Թբիլիսիի քաղաքային դատարանի դատավոր Գիորգի Արևաձեն չի բավարարել Վրաստանի նախկին նախագահ Միխեիլ Սաակաշվիլիին քրեական պատժից ազատելու կամ պատիժը հետաձգելու վերաբերյալ փաստաբանների միջնորդությունը։
Այսպիսով, Սաակաշվիլին կշարունակի բանտարկված մնալ Թբիլիսիի Vivamedi կլինիկայում, գրում է BBC-ի ռուսական ծառայությունը։
Որոշումը հարուցել է դատավարությանը ներկա և դատարանի բակում դատավորի որոշմանը սպասող մարդկանց վրդովմունքը։ Հավաքվածները վարկարկել են՝ «Ստրո՛ւկ, ստրո՛ւկ»։
«Ես այլ բան չէի ակնկալում, քանի որ այն պայմաններում, որում մենք ապրում ենք, այլ որոշում չէր կարող լինել։ Այս իշխանությունների միակ դաշնակիցը Ռուսաստանն է, սա է այսօրվա իրականությունը, ողջ առաջադեմ մարդկությունն իմ որդու կողքին է»,- դատավորի որոշման հրապարակումից հետո ասել է Սաակաշվիլիի մայրը՝ Ջուլի Ալասանիան։
Սաակաշվիլիի մերձավորները վաղուց են ահազանգում նրա առողջական վիճակի մասին՝ նշելով, որ չնայած բուժհաստատությունում գտնվելուն՝ նրա վիճակն օրեցօր վատանում է։ Նրանք Սաակաշվիլիի կյանքը փրկելու միակ ճանապարհը համարում են արտասահման բուժման տեղափոխումը։
Սաակաշվիլիի փաստաբանները դեկտեմբերի 1-ին միջնորդություն էին ներկայացրել դատարան և պահանջում էին ազատ արձակել երկրի նախկին նախագահին կամ հետաձգել նրա պատիժը՝ պատճառաբանելով ծանր հիվանդությունը։
Տաթև Ֆռանգյան
