16.01.2026 | 16:25
Իսրայելական բանակի ուղղաթիռը վթարի է ենթարկվել. ՏԵՍԱՆՅՈՒԹ
Պուտինը պատգամավորներին թույլատրել է եկամուտների մասին տեղեկություններ չհրապարակել հանրային տիրույթում
Քաղաքականություն
06.02.2023 | 17:28
ՌԴ նախագահ Վլադիմիր Պուտինն օրենք է ստորագրել, որը թույլ կտա պատգամավորներին և սենատորներին բաց տիրույթում չհրապարակել իրենց եկամուտների մասին տեղեկությունները։ Փաստաթուղթը հրապարակված է իրավական տեղեկատվության պաշտոնական պորտալում, գրում է «Մեդուզա»-ն։
Ռուս պատգամավորներն ու սենատորները կշարունակեն ներկայացնել իրենց եկամուտների և ծախսերի հայտարարագրերը, սակայն համացանցում կհրապարակվի միայն ընդհանրացված վիճակագրական տեղեկատվություն՝ առանց անձնական տվյալների։ Փաստաթուղթն ուժի մեջ կմտնի 2023 թվականի մարտի 1-ից։
Օրենքի հեղինակներից Պետդումայի օրենսդրության հանձնաժողովի նախագահ Պավել Կրաշենիննիկովը հայտարարությունների հրապարակման կանոններում փոփոխությունները բացատրել է նրանով, որ «ոչ բոլորին [պատգամավորներին և սենատորներին] է հետաքրքրում, ոչ բոլորն են ուզում դա անել՝ ծուլանում են»։ Բացի այդ, ըստ նրա, ոչ բոլոր խորհրդարանականներն են ցանկանում «ցուցադրել իրենց եկամուտները»։
Կրեմլում հայտարարել են, որ հայտարարագրերի ներկայացման նոր ընթացակարգը չի ազդի կոռուպցիայի դեմ պայքարի վրա, քանի որ պատգամավորներն ու սենատորները կշարունակեն հաշվետվություններ ներկայացնել եկամուտների մասին։ ՌԴ նախագահի մամուլի քարտուղար Դմիտրի Պեսկովն էլ փոփոխությունների անհրաժեշտությունը բացատրել է նրանով, որ «հատուկ ռազմական օպերացիայի պայմաններն իրենց առանձնահատկություններն են բերում»։
Տաթև Ֆռանգյան
