ԱՄՆ-ը խոցել է չինական զոնդը․ Պեկինն արձագանքել է

ԱՄՆ ռազմաօդային ուժերը Հարավային Կարոլինայի երկնքում՝ երկրի հարավ-արևելյան ափերի մոտ, խոցել են Չինաստանին պատկանող  զոնդը (օդապարիկ)։ Փետրվարի 4-ին Պենտագոնի ներկայացուցիչները հայտնել են, որ չինական զոնդը խոցվել է F-22 բազմաթիրախային կործանիչից արձակված հրթիռով։

ԱՄՆ պաշտպանության նախարար Լլոյդ Օսթինը գործողությունն անվանել է «կանխամտածված և օրինական գործողություն», որը պատասխան է Չինաստանի կողմից Միացյալ Նահանգների ինքնիշխանության «անընդունելի խախտմանը»:

Պեկինը դատապարտել է Պենտագոնի որոշումը՝ Ատլանտյան օվկիանոսում Միացյալ Նահանգների տարածքային ջրերի վրայով օբյեկտ ոչնչացնելու մասին, որը Վաշինգտոնում անվանել են չինական «հետախուզական զոնդ»: DW-ի փոխանցմամբ՝ այս մասին հայտարարություն է տարածել Չինաստանի ԱԳՆ-ը։ ՉԺՀ-ում ԱՄՆ-ին մեղադրել են «ակնհայտ չափից ավելի արձագանքի և միջազգային պրակտիկայի լուրջ խախտման» մեջ։

«Չինաստանը զանգվածային դժգոհություն և բողոք է հայտնում Միացյալ Նահանգների կողմից ուժի կիրառման դեմ ՝ հարձակվելու համար «օբյեկտի» վրա, որը Պեկինում նկարագրվել է որպես «քաղաքացիական անօդաչու սարք»:

ՉԺՀ ԱԳՆ-ն իրեն իրավունք է վերապահում «հետագա անհրաժեշտ պատասխան գործողությունների»,- նշել են գերատեսչությունում:

Հիշեցնենք՝ Պենտագոնը փետրվարի 2-ին հայտնել է, որ փետրվարի 1-ին ԱՄՆ հյուսիս-արևմուտքում՝ Մոնտանա նահանգի վրա, նկատել է «չինական հետախուզական զոնդ»։

Դրանից հետո ԱՄՆ պետքարտուղար Էնթոնի Բլինքենը չեղարկել էր փետրվարի 5-ին և 6-ին Պեկին այցը։ Բլինքենն ի գիտություն է ընդունել օդապարիկի հետ կապված միջադեպին հաջորդած ՉԺՀ-ի հայտարարությունը, սակայն ընդգծել է, որ խոսքը «անպատասխանատու արարքի» և «ԱՄՆ-ի ինքնիշխանության և միջազգային իրավունքի ակնհայտ խախտման» մասին է:

Պենտագոնի մամուլի քարտուղար Փեթ Ռայդերը հայտնել է, որ զոնդը համալրված է եղել հետախուզական սարքավորումներով, ինչպես նաև օգտակար բեռով։ Ռայդերի խոսքերով՝ անմիջապես միջոցներ են ձեռնարկել գաղտնի տեղեկատվության հավաքումից պաշտպանվելու համար:

ԱՄՆ պաշտպանության նախարար Լլոյդ Օսթինը հստակեցրել է, որ զոնդի շարժին հետևելու գործողությունները ձեռնարկվել են Կանադայի կառավարության համակարգմամբ և լիակատար աջակցությամբ:

Չինաստանում պնդում են, որ օբյեկտն օգտագործվել է օդերևութաբանական տվյալներ հավաքելու համար
և պատահաբար հայտնվել է ԱՄՆ-ի օդային տարածքում։

Պեկինը հերքել է Վաշինգտոնի մեղադրանքները հնարավոր լրտեսության մասին։