28.10.2026 | 16:31
Նիկոլ Փաշինյանը ցավակցել է Իսպանիայի ժողովրդին ու կառավարությանը գնացքների բախման հետևանքով զոհերի կապակցությամբ
«Սա ցինիզմ է»․ ՔՊ-ականը մեղադրում է Լավրովին․ ՀՅԴ-ն և ՀՀԿ-ն՝ իշխանությանը. ՏԵՍԱՆՅՈՒԹ
Քաղաքականություն
03.02.2023 | 19:00
ՌԴ ԱԳ նախարար Սերգեյ Լավրովը երեկ ուշագրավ հայտարարություն էր արել այն մասին, թե «Երևանի ցանկության դեպքում հայ- ասդրբեջանական սահման ՀԱՊԿ խաղաղապահ առաքելություն կարող է գործուղվել մեկ կամ երկու օրվա ընթացքում»։ Հայաստանի իշխանական խմբակցության պատգամավոր Վիգեն Խաչատրյանն այս հայտարարությունը «ցինիկ» է որակում։
2022 թվականի սեպտեմբերի 13-ին ՀՀ սուվերեն տարածք ադրբեջանական զորքերի ներխուժումից հետո Հայաստանը ՀԱՊԿ անդամ պետություններից պահանջեց Բաքվի գործողություններին քաղաքական գնահատական տալ, ինչը մինչ այս պահը չի արվել։ Ավելին՝ ՀԱՊԿ անդամ երկրներից Բելառուսի նախագահ Ալեքսանդր Լուկաշենկոն հայտարարել էր, որ Ալիևն իրենց մարդն է։ Չնայած այս ամենին՝ ԱԺ «Պատիվ ունեմ» խմբակցության ղեկավար Հայկ Մամիջանյանը հայտարարում է՝ պաշտոնական Երևանը հրաժարվել է ՀԱՊԿ-ի առաջարկած զենքից ու խաղաղապահներից, փոխարենն ընդունել ԵՄ քաղաքացիական դիտորդներին։
Պաշտոնական Երևանը բազմիցս հայտարարել է՝ ՀԱՊԿ-ը պետք է արձանագրի, որ ադրբեջանական կողմը ներխուժել է ՀՀ սուվերեն տարածք, որպեսզի հստակ լինի, թե խաղաղապահները որտեղ են տեղակայվելու։ «Հայաստան» խմբակցության պատգամավոր Արմեն Ռուստամյանի խոսքով՝ առանց այդ արձանագրման էլ խաղաղապահներին պետք է թույլ տալ, որ գան Հայաստան, ինչը ՔՊ-ական Վիգեն Խաչատրյանն անընդունելի է համարում։
Այսօր նաև փորձեցինք պարզել Հայաստանի խորհրդարանական խմբակցությունների դիրքորոշումները Լավրովի մյուս հայտարարության առնչությամբ։ Հիշեցնենք՝ ՌԴ ԱԳՆ ղեկավարը հայտարարել էր, թե Հայաստանը երկար տարիներ օկուպացրել էր Ադրբեջանի յոթ շրջաններ, մերժել հարցը լուծելու Մոսկվայի առաջարկները, որից հետո էլ Ադրբեջանը վերադարձրել է իրեն պատկանող հողերը։ Նիկոլ Փաշինյանի ղեկավարած ՔՊ-ի ներկայացուցիչները ԱԺ-ում խուսափում էին այս հարցին անդրադառնալ։ Մեզ հետ հեռախոսազրույցում միայն Վիգեն Խաչատրյանը նշեց, որ Լավրովն այդ հայտարարությամբ Բաքվի շահերն է սպասարկում։ Իսկ ահա ընդդիմադիր «Հայաստան» և «Պատիվ ունեմ» խմբակցությունների ներկայացուցիչները պնդում էին, որ եթե ՀՀ իշխանությունները ՌԴ-ի հետ հարաբերությունները դաշնակցային պահեին, Լավրովը նման միտք չէր արտահայտի։
Նշենք, որ պաշտոնական Երևանը Լավրովի հայտարարություններից մեկ օր անց վարչապետի աշխատակազմի կամ ԱԳՆ-ի մակարդակով դեռ չի արձագանքել։
Նարեկ Կիրակոսյան
Մանրամասները՝ տեսանյութում։
