Մեծ առճակատում է ՌԴ-ի և Արևմուտքի միջև․ Էրդողանը զայրացնում է ՆԱՏՕ-ին՝ ճգնաժամի վրա առևտուր է անում․ Նելլի Մինասյան․ՏԵՍԱՆՅՈՒԹ

Թուրքիան փաստացի խոչընդոտում է ՆԱՏՕ-ն ընդլայնելու Արևմուտքի ծրագրերին։ ՌԴ-ի սկսած պատերազմից հետո Շվեդիան և Ֆինլանդիան հայտարարեցին ՆԱՏՕ-ին միանալու մտադրության մասին, դարձան թեկնածու։ Անկարան պայմաններ էր առաջադրել, որոնց կատարման դեպքում կհամաձայնվեր միացումներին։ Եվ արի ու տես՝ դանիացի աջ ծայրահեղական Ռասմուս Փալուդան Ստոկհոլմում Թուրքիայի դեսպանատան մոտ այրում է մահմեդականների սուրբ գիրք Ղուրանը, ինչն առիթ դարձնելով՝ Էրդողանը հայտարարում է, որ Անկարան չի աջակցի Շվեդիայի անդամակցությանը ՆԱՏՕ-ին։ ԱՄՆ նախագահ Ջո Բայդենին հարող «Bloomberg» գործակալությունը նշել է, որ ՆԱՏՕ-ի առաջնորդները պետք է ճնշում գործադրեն Էրդողանի վրա, որպեսզի վերջինս հավանություն տա սկանդինավյան երկրների անդամակցությանը ՆԱՏՕ-ին: Հակառակ պարագայում, ըստ ԶԼՄ-ի, պետք է օրակարգ բերվի Թուրքիային ՆԱՏՕ-ից վտարելու հարցը:

Թուրքագետ Նելլի Մինասյանը Factor TV-ի հարցազրույցում ասում է, որ Արևմուտքի կողմից ՆԱՏՕ-ից Թուրքիային վտարելու այսպիսի զգուշացումները, ինչպես նաև Էրդողանին բռնապետ որակելը բարձր մակարդակներով ճնշում են Անկարայի վրա, որն ըստ թուրքագետի՝ անկանխատեսելի է դարձել Արևմուտքի համար և նրանից ինքնուրույն քաղաքականություն է վարում։ Դա զայրացնում է Արևմուտքին․

«Էրդողանը նաև մեծ ամբիցիաներ ունի, որոնք Թուրքիայի սահմաններից դուրս են գալիս արդեն։ Օրինակ՝ Սիրիայում Թուրքիայի ռազմական օպերացիաները տեղի ունեցան առանց Արևմուտքի թույլտվության։ Բացի այդ՝ այս պահին մեծ առճակատում է ՌԴ-ի և Արևմուտքի միջև, և պատժամիջոցներ են կիրառվում ՌԴ-ի դեմ, մինչդեռ Թուրքիան Արևմուտքի հիմնական պատժամիջոցներին չի միացել»,- ասաց Նելլի Մինասյանը։

Հարցազրույցն ամբողջությամբ՝ տեսանյութում։

Ռոբերտ Անանյան