08.10.2026 | 23:18
Քննարկվել են ՀՀ-ի և Իրանի մաքսային մարմինների միջև նախնական էլեկտրոնային տվյալների փոխանակման համակարգի գործարկման քայլեր
Հունգարիան աջակցում է Խաղաղության Նոբելյան մրցանակի համար Էրդողանի առաջադրմանը
Քաղաքականություն
31.01.2023 | 17:30
Հունգարիան կշնորհեր Խաղաղության Նոբելյան մրցանակը Թուրքիայի նախագահ Ռեջեփ Թայիփ Էրդողանին Ռուսաստանի ու Ուկրաինայի պատերազում հաջող միջնորդության համար․ այս մասին հայտարարել է Հունգարիայի ԱԳ նախարար Պետեր Սիյարտոն, գրում է Telex.hu-ն։
Թուրքիայի արտգործնախարար Մևլութ Չավուշօղլուի հետ համատեղ մամուլի ասուլիսում Սիյարտոն ասել է, որ վերջին համաշխարհային և եվրոպական իրադարձությունները զգալիորեն մեծացրել են Թուրքիայի դերը։ Նրա կարծիքով Էրդողանը միակ ղեկավարն է, որը կարողացել է որոշակի հաջողությամբ միջնորդել Ռուսաստանի և Ուկրաինայի միջև։
«Ցանկացած ոք, որը խոսում է խաղաղության մասին, անմիջապես ներկայացվում է որպես Պուտինի դաշնակից, նրանց անմիջապես ներկայացնում են որպես ռուսների բարեկամ, Կրեմլի քարոզիչ: Բայց պատերազմի ավարտի միակ ճանապարհը բանակցություններն են: Միջնորդության Թուրքիայի հաջող փորձերն ապացուցել են սա»,-ասել է հունգարացի նախարարը։
«Մենք կոչ ենք անում Թուրքիային շարունակել իր միջնորդական ջանքերը, քանի որ Թուրքիայի ջանքերի շնորհիվ մենք կարող ենք ավելի մոտենալ խաղաղության հույսին»,- ասել է Սիյարտոն։
Հավելենք, որ ավելի վաղ Թուրքիայի խորհրդարանի նախագահ Մուստաֆա Շենթոփը հայտարարել էր Էրդողանին Խաղաղության Նոբելյան մրցանակի առաջադրելու մասին։
«Ես նախագահ Էրդողանին առաջադրել եմ Խաղաղության Նոբելյան մրցանակի՝ Ռուսաստանի և Ուկրաինայի միջև խաղաղության ջանքերի համար։ Ես ունեմ դիմումը։ Լինելու են նաև տարբեր երկրների խորհրդարանի նախագահների և պատգամավորների դիմումներ»,- ասել էր Շենթոփը։
Էմմա Չոբանյան
