21.02.2026 | 10:27
Ստեփանծմինդա-Լարս ավտոճանապարհը փակ է կցորդով բեռնատարների համար
Հրդեհի գործով լրագրողներին հարցազրույց տված դասակի հրամանատարն ազատվել է ծառայությունից
Հասարակություն
31.01.2023 | 16:19
15 զինծառայողների մահվան ելքով հրդեհից հետո լրագրողներին հարցազրույց տված դասակի հրամանատարն ազատվել է ծառայությունից։ Այս մասին Factor.am-ի հետ զրույցում ասաց հրամանատարի փաստաբան Արսեն Բաբայանը։
«Կան հանգամանքներ, որոնց մասին այս պահին նպատակահամար չեմ համարում բաձրաձայնել՝ նկատի ունենալով դասակի հրամանատարի իրավունքների արդյունավետ պաշտպանությունը․ իր զեկուցագրի հիման վրա ազատվել է ծառայություննից»,- ասաց Արսեն Բաբայանը։ Վերջինս նաև ասաց, որ դասակի հրամանատարը հարցաքննվել է վկայի կարգավիճակով։
«Հաշվի առնելով նախաքննության գաղտնիությունը՝ շատ բան չեմ կարող ասել, միայն կարող եմ ասել, որ նա դեպքի հանգամանքների վերաբերյալ չունի և չի էլ կարող ունենալ տեղեկություն, քանի որ այնտեղ չի եղել»,- ասաց Բաբայանը։
Հիշեցնենք, որ հունվարի 19-ին՝ ժամը 01:30-ի սահմաններում հրդեհ է բռնկվել Գեղարքունիքի մարզի Ազատ գյուղի տարածքում տեղակայված ՀՀ ՊՆ N զորամասի ինժեներասակրավորային վաշտի կացարանում, որի հետևանքով 15 զինծառայող է մահացել։
Հրդեհից ժամեր անց զորամասի դասակի հրամանատարը լրագրողների հետ զրույցի ընթացքում քննադատել էր բանակում տիրող իրավիճակը։
«Բանակի թուլացումը կամ կա չէ՞ զինվորականության ոլորտում, որ ասում, են՝ «բարդակ», ներողություն եմ խնդրում մի քիչ անշնորհք խոսելուս համար, գալիս է բոլորից՝ գլխավոր շտաբի պետ, նախարար, վարչապետ։ Սրանից հետո ինձ ինչ ուզում են թող ասեն կամ չանեն, դա ինձ չի հետաքրքրում։ Երբ ծնողներին չես կարող պատասխան տալ, դրանից վատ բան չկա»,- ասել էր հրամանատարն ու նշել, որ մահացած զինծառայողների ծնողները գալիս ու իրենց երեխաներից են հետաքրքրվում, իսկ իրենք պատասխաններ չունեն։
Արաքս Մամուլյան
