Բաքուն հայտարարում է, որ «Իրանի գործակալների է ձերբակալել»

Այսօր Բաքվում հատուկ գործողություն է իրականացվել  «Իրանի գործակալական  ցանցի դեմ»։ Տեղական լրատվամիջոցների հաղորդմամբ՝ ՆԳՆ-ի գործողությունների արդյունքում ձերբակալվածներ կան։ Ուշագրավ է, որ գործողություններ են իրականացվել նաև SalamNews և Interaz լրատվական գործակալություններում։

Նշվում է, որ ներքին գործերի նախարարության աշխատակիցների կողմից իրականացված հատուկ գործողության արդյունքում Բաքվում և երկրի այլ շրջաններում որպես կասկածյալ բերման է ենթարկվել 7 անձ՝ Ա.Թ. Քարիմովը, Է.Ա. Ռագիմովը, Ի.Ա.Ալեքպերովը, Մ.Ն.Ջաֆարովը, Գ.Հ. Ջաբարլին, Ֆ.Ս. Աբդուլովը և Ա.Ա. Ջումշուդովը։ Այլ մանրամասներ դեռ չեն հաղորդվում։

Հավելենք, որ ամեն անգամ, երբ որոշակի լարվածություն է առաջանում Իրանի և Ադրբեջանի հարաբերություններում, Բաքուն սկսում է հետապնդել իրանամետ գործիչներին, հատկապես՝ հոգևոր, որոնց ձերբակալությունները սկսել են պարբերական բնույթ կրել։ Ամիսներ առաջ էլ Ադրբեջանի իշխանությունները հայտնել էին «իրանական լրտեսական ցանցի բացահայտման մասին»։

Երկու երկրների հարաբերություններում վերջին լարվածությունը պայմանավորված է Թեհանում Ադրբեջանի դեսպանատան վրա հարձակմամբ։ 1 մարդ զոհվել էր, կան վիրավորներ, հարձակվողին ձերբակալել են։ Պաշտոնական Բաքուն Իրանում Ադրբեջանի դեսպանատան վրա իրականացված հարձակումն «ահաբեկչություն» է որակել։ Հարձակման վերաբերյալ Թեհրանի քրեական դատախազի պաշտոնակատարն ասել է, որ զինված անձը Թեհրանում Ադրբեջանի դեսպանատան վրա հարձակվել է անձնական դրդապատճառներով։ Միջադեպից հետո Բաքուն տարհանել է Թեհրանում Ադրբեջանի դեսպանատան աշխատակիցներին, և այս պահին դեսպանատան գործունեությունը դադարեցված է։

Էմմա Չոբանյան