27.06.2026 | 15:00
Ուկրաինան հարվածել է Մոսկվային վառելիք մատակարարող «Վտորովո» նավթամղիչ կայանին. meduza
Հունաստանը Թուրքիայի հետ սահմանային պարիսպը 35 կմ-ով երկարացնելու է
Քաղաքականություն
24.01.2023 | 22:10
Հունաստանի կառավարությունը ծրագրում է Թուրքիայի հետ հյուսիսային սահմանին պարիսպը 35 կմ-ով ընդլայնել՝ փախստականների հոսքը զսպելու համար։ Այս մասին գրում են հունական լրատվամիջոցները, որոնց վկայակոչում է Turkish Minute-ը։
Հունաստանն արդեն 40 կմ պարիսպ է կառուցել Էվրոս գետի երկայնքով՝ Թուրքիայի հետ սահմանին՝ անօրինական միգրանտների մուտքը երկիր կանխելու համար, իսկ անցյալ տարվա օգոստոսին որոշվեց երկարացնել պարիսպը Թուրքիայի հետ սահմանի ամբողջ երկայնքով։
Հունաստանի քաղաքացիական պաշտպանության նախարար Թակիս Թեոդորիկակոսը Skai TV-ին տված հարցազրույցում ասել է, որ իր ղեկավարած գերատեսչության և Պաշտպանության նախարարության կողմից ավարտվել է պարիսպը 35 կմ-ով առաջին անհապաղ երկարաձգելու հարցով ուսումնասիրությունը, հիմա սպասում են Ֆինանսների նախարարության հաստատմանը։ Պարսպի երկարաձգումը գնահատվում է 108 մլն եվրո։
Թեոդորիկակոսն ասել է, որ եթե Ֆինանսների նախարարությունը հաստատի, ապա ծրագիրն արագորեն առաջ կգնա։
2012 թվականին կառուցված պարիսպը վերջին անգամ երկարացվել է 2021 թվականին՝ մեկ տարի անց այն բանից հետո, երբ տասնյակ հազարավոր ապաստան հայցողներ փորձել են անցնել Եվրամիության տարածք Հունաստանի հյուսիսային սահմանով, երբ Թուրքիան ասել էր, որ այլևս չի խանգարի նրանց դա անել:
Հունաստանն ու Թուրքիան վերջին տարիներին մի շարք հարցերի շուրջ ունեն լուրջ տարաձայնություններ, այդ թվում՝ միգրացիան, էներգետիկ ռեսուրսները։
Հույն նախարարը, վկայակոչելով պաշտոնական տվյալները, հայտարարել է նաև, որ 2022 թվականին Էվրոսի սահմանով 250 հազար անօրինական միգրանտների մուտքը Հունաստան կանխվել է։
Ի դեպ, Անկարան Աթենքին բազմիցս մեղադրել է Էվրոսով ու Էգեյան ծովով փախստականներին Թուրքիա վերադարձնելու մեջ, ինչը Հունաստանը հերքում է։
Էմմա Չոբանյան
