14.12.2025 | 10:10
Ահազանգեր են ստացվել տապալված ծառերի, սյուների, ինչպես նաև պոկված կառուցատարրերի վերաբերյալ
Ինչո՞ւ է դպրոցներում «հայրենասիրության դասավանդումը» հակառակ արդյունքը տալիս. ապաքաղաքական զրույց Արեգ Դանագուլյանի հետ. ՏԵՍԱՆՅՈՒԹ
Հաղորդաշարեր
22.01.2023 | 21:02
Factor TV-ի A-politic հաղորդաշարի հյուրն է ԱՄՆ Մասաչուսեթսի տեխնոլոգիական ինստիտուտի պրոֆեսոր Արեգ Դանագուլյանը: Նրա կարծիքով՝ կրթության և գիտության՝ համալսարաններում համատեղելու մոդելը, որը կիրառվում է ԱՄՆ-ում, արդյունավետ է գիտական արդյունքի տեսանկյունից: Բայց այդ մոդելը Հայաստանում կամ այլ երկրներում կիրառելիս պետք է հաշվի առնել առկա հնարավորություններն ու ավանդույթները: Պրոֆեսորի համոզմամբ՝ մեծ ծրագրեր Հայաստանում առայժմ չի ստացվում իրականացնել, այդ պատճառով անհրաժեշտ է նախօրոք հաշվարկել ռիսկերը:
Ինչպե՞ս անել, որ Հայաստանում երիտասարդները ցանկանան դասավանդել դպրոցում: Պատասխանելով այդ հարցին՝ հաղորդման հյուրը կարծիք է հայտնում, որ պետք է համատեղել նյութական և բարոյական խթանները. վերջիններիս թվում են դպրոցներում աշխատանքային նորմալ պայմանները, հետաքրքիր և բովանդակալից ծրագրերն ու դասագրքերը: Արեգ Դանագուլյանն այդ համատեքստում անդրադառնում է Բրյուսովի անվան լեզվաբանական և Մանկավարժական համալսարանների միաձուլման գաղափարին. ըստ նրա՝ եթե որևէ հաստատության արդյունավետությունը մոտ է զրոյին, ապա այն պետք է փակվի:
Անդրադառնալով երիտասարդների սոցիալիզացիայի խնդրին՝ գիտնականը նկատում է, որ դպրոցում «հայրենասիրության դասավանդման» արհեստական փորձերը սովորաբար հանգեցնում են հակառակ արդյունքի: Երբ, օրինակ, պատմության ուսուցիչը ոչ թե փորձում է խորանալ իրադարձությունների պատճառահետևանքային կապերի մեջ, այլ երեխաներին մատուցում է միֆերի հավաքածու, դպրոցականները «գուգլելիս» ստուգում են փաստերը, հետո այլևս չեն հավատում այդ ուսուցչի ոչ մի ասածին: Արդյունքում հասարակության մեջ դաստիարակվում են անհավատությունն ու ցինիզմը:
Մանրամասները՝ տեսանյութում:
Արամ Աբրահամյան
