Նախիջևանում շարունակվում են աղմկոտ ձերբակալությունները․ բարձրաստիճան հերթական պաշտոնյան է կալանավորվել

Նախիջևանի Ինքնավար Հանրապետությունում շարունակվում են բարձրաստիճան պաշտոնյանների կալանավորումներն ու պետական գերատեսչություններում ստուգումները։ Ադրբեջանական լրատվականները հայտնում են, որ Բաքվի Սաբայիլի շրջանային դատարանը կալանավորել է Նախիջևանի քաղաքաշինութան կոմիտեի ղեկավար Հիջրան Ռուստամովին։

Պաշտոնյան մեղադրվում է Նախիջևանի Ինքնավար Հանրապետության տարածքում շինարարության և բարեկարգման համար նախատեսված ավելի քան 212 մլն մանաթ պետական ​​միջոցների յուրացման համար։

Սա Նախիջևանից երրորդ բարձրաստիճան պաշտոնյան է, որը կալանավորվել է Ադրբեջանի պետական ​​անվտանգության ծառայության կողմից իրականացվող հետաքննության ընթացքում։

Հիշեցնենք, որ օրերս Բաքվի նույն դատարանը 4 ամիս ժամկետով կալանավորել էր Նախիջևանի ֆինանսների նախարար Ռաֆայել Ալիևին։ Նա մեղադրվում է իշխանության չարաշահման և 144 միլիոն մանաթ պետական ​​միջոցների յուրացման համար։ Ադրբեջանի պետական անվտանգության ծառայությունը հատուկ գործողություն էր իրականացրել նաև Նախիջևանի Մաքսային կոմիտեում՝ ձերբակալելով  գերատեսչության բաժնի պետ Մանսուր Ասկերովին։ Նոյեմբերի 24-ին Սաբայիլի շրջանային դատարանը նրան ևս 4 ամսով կալանավորելու որոշում էր կայացրել։ Նա էլ մեղադրվում է 132 մլն մանաթ յուրացնելու համար։

Ոչ պաշտոնական տվյալներով՝ Նախիջևանի տարբեր գերատեսչություններից տասնյակ պաշտոնյաներ են ձերբակալվել։

Բաքվում տարբեր փորձագետներ նշում են, որ ուժային կառույցների հիմնական հարվածն ուղղված է «Նախիջևանի խան», Գերագույն Մեջլիսի նախագահ Վասիֆ Թալիբովի դեմ, որը մինչև վերջերս համարվում էր անձեռնմխելի, և հիմա օղակը սկսել է սեղմվել անձամբ նրա ընտանիքի անդամների շուրջ։ Ադրբեջանի նախագահ Իլհամ Ալիևը, ըստ երևույթին, որոշել է վերջ դնել նրա 27-ամյա կառավարման ժամանակաշրջանին։

Ավելի վաղ նաև լուրեր էին տարածվել, որ Թալիբովը հրաժարականի դիմում է ներկայացրել, որը, սակայն, պաշտոնապես չհաստատվեց։ Նախօրեին էլ ադրբեջանական որոշ լրատվականներ հայտնել էին, որ Թալիբովը ժամանել է Բաքու, ինչը կապված է Նախիջևանում տիրող իրադարձությունների հետ։

Հավելենք, որ Թալիբովը հայտնի է որպես Ադրբեջանի նախկին նախագահ, ներկայիս նախագահ Իլհամ Ալիևի հոր՝ Հեյդար Ալիևի ամենամոտ մարդկանցից մեկը։ Նախիջևանում Հեյդար Ալիևի ղեկավարման տարիներին (1991-1993 թթ.) Թալիբովը եղել է Ինքնավար Հանրապետության Գերագույն Մեջլիսի նախագահի գլխավոր օգնականը, 1995 թվականից մինչ օրս Նախիջևանի Ինքնավար Հանրապետության խորհրդարանի ղեկավարն է։ Թալիբովն իշխանության է հասել Սևիլ Սուլթանովայի հետ ամուսնության շնորհիվ, որը Հեյդար Ալիևի զարմուհին է՝ եղբոր դուստրը։

Էմմա Չոբանյան