Ռուբեն Վարդանյանը՝ Ադրբեջանի կողմից միջանցքը փակելու, գազի մատակարարումը դադարեցնելու մասին․ ՏԵՍԱՆՅՈւԹ

Քիչ առաջ Արցախի պետական նախարար Ռուբեն Վարդանյանը ֆեյսբուքյան ուղիղ եթերում խոսել է Արցախը Հայաատանին կապող ավտոճանապարհին ստեղծված իրավիճակի մասին։

Մենք արդեն մի քանի օր գտնվում ենք շատ լուրջ ճգնաժամի մեջ, այսօր էլ շարունակել է Ադրբեջանը իր ոչ մարդկային մոտեցումը մեր նկատմամբ եւ դադարեցրել է գազի մատակարարումը:

Դա նշանակում է, որ մենք պետք է շատ խնայողական մոտենանք մեր բոլոր էներգիայի ծախսերին: Պետք է ամեն ինչ անենք, որ փորձենք պահպանել մեր ապրելաձեւը, բայց մյուս կողմից հասկանալի է, որ ճգնաժամն իրականություն է դարձել բոլորիս համար:
Մենք բոլորս պատրաստ ենք պայքարի, պետք է ամեն ինչ անենք, որ այս վիճակում ցույց տանք՝ ով է արցախցին, ոնց ենք մենք ընդիմանում մարտահրավերներին և չենք վախենում ոչ մեկից։ Այո, ծանր է լինելու։ Բայց մենք անցնելու են այս ամենի միջով և հաղթելու ենք»,- ասաց Վարդանյանը։

Արցախի պետնախարարը հավելեց, որ ստիպված են լինելու վաղվանից փակել Արցախի դպրոցները և բուհերը․ «Վաղվանից չեն աշխատելու այն դպրոցները և համալսարանները, որտեղ չկան փայտի վառարաններով տաքացնելու հնարավորություն: Մենք ունենք հնարավորություն պահելու էներգիայի մի մասը տարբեր տեղերում, բայց ամբողջը չենք կարող: Խնդրում եմ բոլորիդ խնայողական լինեք, որովհետև չգիտենք, թե որքան երկար է տևելու այս իրավիճակը»:

«Մենք ամեն ինչ անում ենք, որ այս ամենի մասին իմանա ամբողջ աշխարհը, աշխարհը տեսնի Ադրբեջանիիսկական դեմքը, որ հասկանան՝ անհնար է իրենց հետ ապրել ինչ-որ ձևով հարաբերություն ունենալով»,- նշեց Վարդանյանը՝ արցախցիներին կոչ անելով լինել ուժեղ և հավատալ, որ միասին հաղթահարելու են այս իրավիճակը:

«Ադրբեջանցիները սրանով ամենամեծ սխալն են արել, որովհետև այս տարբերակով իրենք ոչ մեկին չեն կարող ապացուցել, որ մենք կարող ենք իրենց հետ ինչ-որ ձևով համախմբվել և իրենց հետ միասին ինչ-որ բան անել»,- ընդգծեց Արցախի պետնախարարը:

Մանրամասները՝ տեսանյութում։