Արժեքային ճգնաժամը, կայսրության «ապուշ վայրագությունը» և կորցրած ամոթը. ապաքաղաքական զրույց Միքայել Հայրապետյանի հետ. ՏԵՍԱՆՅՈՒԹ

Factor TV-ի A-politic հաղորդաշարի հյուրն է հասարակական-քաղաքական գործիչ, բանասեր Միքայել Հայրապետյանը: Նրա կարծիքով՝ ազգակերտման գործընթացը շարունակական է, և հայերի դեպքում այն սկսվել է Մաշտոցից և Խորենացուց: Հաղորդման հյուրը համաձայն չէ, որ 21-րդ դարում մենք այս առումով հետ ենք ընկել ուկրաինացիներից: Նրա համոզմամբ՝ Հայաստանը 44-օրյա պատերազմում կռվում էր գրեթե ամբողջ աշխարհի հետ, իսկ Ուկրաինան քաղաքակիրթ աշխարհի առաջապահի դիրքերում է:

Միքայել Հայրապետյանը վստահ է, որ թե՛ հայ, թե՛ այլ ժողովուրդներն առաջնորդվում են այն մոդելներով, որոնք իրենց տալիս է իշխանությունը, վերնախավը: Արժեքային ճգնաժամի մեջ ժողովրդին մեղադրելը սխալ է: Ազգը կերտում են հերոսները՝ այդ բառի լայն իմաստով, և պետական ինստիտուտները: Եթե մարդիկ կորցրել են ամոթի, կարմրելու ցանկությունը, ապա դա այդ երկու ուղղություններով թերացումների հետևանք է: Արժեքային ճգնաժամը պայմանավորված է հենց նման գործոններով:

Արձագանքելով նշանավոր պատմաբան Լեոյի այն մտքին, որ 1896 թվականին Կովկասի նահանգապետ նշանակված իշխան Գոլիցինի «ապուշ վայրագությունները» պատճառ դարձան հայերի շրջանում ազգային նոր վերելքի՝ հաղորդման հյուրը դարձյալ համաձայն չէ նման հարցադրման հետ: Ըստ նրա՝ 19-րդ դարի վերջին ազգային զարթոնք չի եղել, իսկ իշխանի գործողությունները որպես «ապուշություն» որակելը նույնպես սխալ է՝ դա կայսրության սովորական գործելակերպն էր, և կայսերական տեսանկյունից՝ միանգամայն արդարացված:

Մանրամասները տեղանյութում։

Արամ Աբրահամյան