16.12.2025 | 13:42
ՀՀ-ն ՆԱՏՕ-ին անդամակցելու հավակնություն չունի. Սարգիս Խանդանյան․ ՏԵՍԱՆՅՈՒԹ
Իրանի իշխանությունները մահապատժի են ենթարկել չորս անձի՝ Իսրայելի հետ կապերի համար
Քաղաքականություն
05.12.2022 | 18:41
Դեկտեմբերի 4-ին Իրանը մահապատժի է ենթարկել չորս անձի, որոնք Իրանի Գերագույն դատարանի կողմից դատապարտվել էին իսրայելական հետախուզության հետ համագործակցելու մեղադրանքով։ Այս մասին հայտնում է Deutsche Welle-ն։
Նույն խմբից ևս երեք անձ դատապարտվել է 5-ից 10 տարի ժամկետով ազատազրկման՝ ազգային անվտանգության դեմ ուղղված հանցագործությունների, առևանգմանը մեղսակցության և զենք-զինամթերք պահելու մեղադրանքով։
Նշենք, որ մայիսի 22-ին Թեհրանում գնդակահարվել էր Իսլամական հեղափոխության պահապանների կորպուսի (ԻՀՊԿ) գնդապետ Սայադ Խոդայը։ Խոդայի վրա հարձակումից ժամեր առաջ ԻՀՊԿ-ն հայտարարեց «իսրայելական հետախուզության հետ կապեր ունեցող հանցագործների» խմբի ձերբակալության մասին, ովքեր, իբր, ներգրավված են եղել մի շարք հանցագործությունների մեջ, այդ թվում՝ «հարձակումներ, առևանգումներ և վանդալիզմ»:
Խոդայը դարձել է Իրանում հարձակման ենթարկված ամենահայտնի զոհը 2020 թվականի նոյեմբերին Թեհրանի Իմամ Հուսեյնի համալսարանի դասախոս Մոհսեն Ֆահրիզադեի սպանությունից հետո: Այդ ժամանակ Թեհրանն Իսրայելին մեղադրեց Իրանի մայրաքաղաքի մոտ Ֆահրիզադեի մեքենաների շարասյան վրա հարձակվելու մեջ։
Ավելի վաղ հաղորդվել էր, որ Իրանը պատրաստվում է մահապատժի ենթարկել երկրի փողոցներում բողոքի ցույցերի դուրս եկած մարդկանց։ Խոսքը 14 հազարից ավելի մարդու մասին է։ Իսկ ավելի ուշ հայտնի դարձավ, որ իրականացվել է ցուցարարի նկատմամբ առաջին մահապատիժը։
Տաթև Ֆռանգյան
