30.10.2026 | 20:18
Միրզոյանը Բահրեյնում կմասնակցի «Մանամայի երկխոսություն» անվտանգության ֆորումին
«Իմ սիմֆոնիկը» մեծ արձագանք է ստացել ուսանողների շրջանում
Մշակույթ
25.11.2022 | 14:26
ՀՀ ԿԳՄՍ նախարարության աջակցությամբ Հայաստանի պետական սիմֆոնիկ նվագախումբը Երևանի բարձրագույն ուսումնական հաստատություններում իրականացնում է «Իմ սիմֆոնիկը» երիտասարդական կրթամշակութային ծրագիրը․ տեղեկացնում են ՀՀ ԿԳՄՍՆ-ից։
Նվագախմբի գեղարվեստական ղեկավար և գլխավոր դիրիժոր Սերգեյ Սմբատյանը, ինչպես նաև նվագախմբի այլ ներկայացուցիչներ հանդիպումներ են ունենում ուսանողների հետ, ներկայացնում են նվագախումբը, դասական երաժշտության թեմաներով հանդես գալիս դասախոսություններով, ուսանողները նաև հրավիրվում են համերգների: Ծրագրի շրջանակում ավելի քան 2100 ուսանող արդեն ներկա է գտնվել համերգներին։
Այս օրերին Հայաստանի պետական սիմֆոնիկ նվագախմբի ներկայացուցիչները համերգներին մասնակցած ուսանողների հետ բուհերում անցկացնում են քննարկումների շարք։ Նպատակն է պարզել ուսանողների տպավորությունները, լսել առաջարկություններ։
Առաջիկայում կամփոփվեն հանդիպումների ընթացքում ուսանողներից հավաքագրված կարծիքները։ Նշենք, որ կազմակերպիչներն իրականացնում են նաև դեմ առ դեմ հարցումներ ուսանողների հետ` ուսումնասիրելու դասական երաժշտության, համերգների, ինչպես նաև նվագախմբի մասին ուսանողների ընկալումները:
Ծրագիրը լայն արձագանք է ստացել ուսանողների շրջանում։ Մեծ է համերգներին այցելել ցանկացողների թիվը։ Շատ երիտասարդների համար դասական երաժշտության համերգները բացահայտում են, ոմանց համար հենց «Իմ սիմֆոնիկ» ծրագիրն է դարձել բարձր երաժշտության հետ շփման առիթ։ Համերգասրահներ այցելելուց, երաժշտություն ունկնդրելուց բացի՝ երիտասարդները ծանոթանում են նաև կոմպոզիտորների կյանքին, նրանց ստեղծագործություններին, դրանց պատմությանը, երաժիշտների ու դիրիժորների գործունեությանը։
Շփումներն ուսանողների հետ ցույց են տալիս, որ վերջիններս ակնկալում են ծրագրի շարունակականություն։ Հատկանշական է, որ նրանցից շատերն ընդգծում են, որ կցանկանային ավելի շատ ունկնդրել հայ կոմպոզիտորների ստեղծագործությունները։
