Քաղաքականություն
22.11.2022 | 18:19
Ռուսաստանն ու Թուրքիան երբեմն տարաձայնություններ ունեն Սիրիայի անվտանգության ապահովման հետ կապված հարցերում, սակայն Մոսկվայի և Անկարայի գործընկերային հարաբերությունները թույլ են տալիս դա բաց ու կառուցողական քննարկել։ Այս մասին լրագրողների հետ զրույցում ասել է ՌԴ նախագահի մամուլի խոսնակ Դմիտրի Պեսկովը, գրում է ՌԻԱ Նովոստին։
«Ռուսաստանի և Թուրքիայի մոտեցումներում որոշակի նրբություններ կան Սիրիայում գործերի դրության և այն հարցում, թե ում պարտավորությունները չեն կատարվել Սոչիի հուշագրով։ Այդ նրբությւոնները, երբեմն՝ նույնիսկ տարաձայնությունները, բազմիցս քննարկվել են երկու երկրների նախագահների միջև»,- ասել է Պեսկովը՝ պատասխանելով հարցին, թե Կրեմլում ինչպե՞ս են վերաբերվում Թուրքիայի նախագահ Ռեջեփ Թայիփ Էրդողանի նախօրեի հայտարարությանն այն մասին, որ ռուսական կողմը չի կատարել 2019 թվականի համաձայնագրով ստանձնած սիրիական շրջանները քրդական զինված խմբավորումներից «մաքրելու» մասին իր պարտավորությունները։
Նա նաև նշել է, որ «Թուրքիայի հետ հարաբերությունների բարեկամական, գործընկերային բնույթը» թույլ է տալիս «բաց և կառուցողական» քննարկել այդ տարաձայնությունները։
Հավելենք, որ Էրդողանը նախօրեին հայտարարել էր, որ Թուրքիան ԱՄՆ-ից և ՌԴ-ից թույլտվություն չի խնդրել Սիրիայում ու Իրաքում ռազմաօդային գործողություն իրականացնելու համար։ Նա նաև մեղադրանքներ է հնչեցրել Մոսկվայի ու Վաշինգտոնի հասցեին՝ սիրիական տարածքներն «ահաբեկիչներից չմաքրելու» և նրանց շարունակվող աջակցության համար։
Էմմա Չոբանյան
