Էրդողանը հայտարարել է, որ Թուրքիան ո՛չ ԱՄՆ-ից, ո՛չ ՌԴ-ից թույլտվություն չի խնդրել Սիրիայում և Իրաքում գործողության համար

Թուրքիան չի տեղեկացնում ԱՄՆ-ին կամ Ռուսաստանին Սիրիայում և Իրաքում «ահաբեկիչներին հարվածելու» ծրագրերի մասին։ Այս մասին հայտարարել է Թուրքիայի նախագահ Ռեջեփ Թայիփ Էրդողանը լրագրողների հետ զրույցում, որոնք ուղեկցել են նրան Կատար այցի ժամանակ, գրում է Անադոլու գործակալությունը։

«Մենք չենք քննարկել գործողության թեման ո՛չ պարոն Բայդենի, ո՛չ պարոն Պուտինի հետ։ Միաժամանակ, Բայդենին և Պուտինին շատ լավ հայտնի է Անկարայի դիրքորոշումը, և այս տարածաշրջանում ցանկացած պահի մեր կողմից հարվածներ հասցնելու հավանականության մասին»,- ասել է էրդողանը՝ պատասխանելով հարցին՝ արդյո՞ք Թուրքիայի զինված ուժերի «հակաահաբեկչական գործողությունների» թեման բարձրացվել է Բալիում ԱՄՆ նախագահ Ջո Բայդենի հետ անձնական հանդիպման, ինչպես նաև ՌԴ նախագահ Վլադիմիր Պուտինի հետ զրույցի ժամանակ։

Նա նշել է, որ Թուրքիայի հատուկ ծառայությունները և իրավապահ մարմինները չեն գործում որևէ երկրի թույլտվության հիման վրա։

«Թուրքիան ինքն է որոշում՝ ինչ քայլեր ձեռնարկի։ Ամերիկացիները պետք է հստակ իմանան այս մասին: Կարծում եմ՝ նրանք արդեն հասկացել են: Բոլոր կողմերը շուտով ականատես կլինեն Թուրքիայի նոր կարևոր քայլերին»,- վստահեցրել է Թուրքիայի ղեկավարը՝ ափսոսանք հայտնելով Սիրիայի հարցում ԱՄՆ դիրքորոշման առնչությամբ։

«Մենք վշտացած ենք այն փաստից, որ ՆԱՏՕ-ում Թուրքիայի դաշնակիցը վերջին տարիներին զինամթերքով և զենքերով լի  հազարավոր բեռնատարներ է մատակարարել Սիրիայի այն շրջաններ, որտեղ գործում են ահաբեկիչները»,- ասել է Էրդողանը՝ նշելով, որ այդ կուրսը շարունակվում է նախագահներ Բարաք Օբամայի, Դոնլադ Թրամփի և Ջո Բայդենի օրոք։

Հարցին՝ արդյո՞ք նախատեսվում է Թուրքիայի զինված ուժերի նոր գործողություն Սիրիայի հյուսիսում և Իրաքում, պետության ղեկավարը վստահեցրել է, որ թուրքական բանակի գործողությունները տարածաշրջանում ահաբեկիչների դեմ կշարունակվեն։

Նա նաև հիշեցրել է 2019 թվականի Սոչիի պայմանավորվածությունների մասին, որոնց համաձայն՝ ռուսական կողմը պարտավորություն է ստանձնել Սիրիայի որոշ հատվածներն ահաբեկիչներից մաքրման հետ կապված։ Էրդողանի պնդմամբ՝ դրանք չեն կատարվել։

Խոսելով Իրաքի հյուսիսում նախօրեին հարձակման մասին՝ Էրդողանն ասել է, որ մինչև 70 ինքնաթիռ և հարվածային անօդաչու է կիրառվել դրա համար։ Նա նշել է, որ հարվածները հասցվել են Իրաքի տարածքում մոտ 140 կմ խորությամբ և Սիրիայի տարածքում՝ 20 կմ խորությամբ։

Նշենք, որ նախօրեին Թուրքիայի իրականացրած ռազմական գործողության ժամանակ տուժել են նաև Իրաքի և Սիրիայի խաղաղ բնակավայրերը։

Էմմա Չոբանյան