29.04.2026 | 18:06
Միրզոյանը և Բարոն քննարկել են Հայաստան-Ֆրանսիա ռազմավարական գործընկերության խորացումն ու Մակրոնի այցը
Պատմական որոշում․ Իսրայելի իշխանությունները ողջունել են դեսպանատուն բացելու՝ Բաքվի որոշումը
18.11.2022 | 21:53
Իսրայելի իշխանությունները մեծ ոգևորությամբ են ընդունել Բաքվի՝ Թել Ավիվում դեսպանատուն բացելու որոշումը։ Մասնավորապես, Իսրայելի ԱԳՆ-ն այս որոշումը պատմական է որակել։
«Այսօր (2022թ․ նոյեմբերի 18-ին) Ադրբեջանի խորհրդարանը պատմական որոշում է կայացրել Իսրայելի Թել Ավիվ քաղաքում Ադրբեջանի դեսպանատուն բացելու մասին։ Սա կլինի շիա մեծամասնություն ունեցող մահմեդական երկրի առաջին դեսպանատունն Իսրայելում»,- ասվում է հայտարարության մեջ:
Իսրայելի վարչապետ Յաիր Լապիդը նույնպես ողջունել է այս որոշումը։
«Ցանկանում եմ շնորհակալություն հայտնել նախագահ Իլհամ Ալիևին և շնորհավորել ադրբեջանական ժողովրդին, որն այժմ առաջին անգամ ներկայացված կլինի Իսրայել պետությունում։ Ողջունում եմ Իսրայելում դեսպանություն բացելու՝ Ադրբեջանի խորհրդարանի որոշումը։ Ադրբեջանը Իսրայելի համար կարևոր գործընկեր է և մահմեդական աշխարհի ամենամեծ հրեական համայնքներից մեկի տունը: Դեսպանություն բացելու որոշումը արտացոլում է երկրների հարաբերությունների խորությունը։ Այս քայլը մահմեդական աշխարհի հետ ամուր քաղաքական կամուրջներ կառուցելու՝ Իսրայելի կառավարության ջանքերի արդյունքն է»,- գրել է Լապիդը թվիթերյան իր էջում։
Հիշեցնենք, որ Ադրբեջանի Միլլի Մեջլիսն այսօր հրավիրված լիագումար նիստում հաստատել է «Իսրայելում Ադրբեջանի դեսպանություն հիմնելու մասին» օրենքը։ Դեսպանատունը բացվելու է Թել Ավիվում։
Էմմա Չոբանյան
