Դիրքային ու տարածքային կորուստների գինը. ինչ ռազմավարական խնդիր է փորձում լուծել Բաքուն․ ՏԵՍԱՆՅՈւԹ

Սեպտեմբերի 13-ի ադրբեջանական ռազմական ներխուժումից ավելի քան մեկուկես ամիս անց գրավված մարտական հենակետերի թվի և ՀՀ-ի օկուպացված տարածքի ընդհանուր մակերեսի վերաբերյալ պաշտոնական տեղեկություններն իրարամերժ են։ Տարբեր բարձրաստիճան պաշտոնյաներ տարբեր հարթակներից այս մասին հակասական տեղեկություններ են հայտնում։

Երեկ ՀՀ ԶՈՒ Գլխավոր շտաբի պետ Էդվարդ Ասրյանը լրագրողների հետ ճեպազրույցում չասաց, թե հակառակորդի վերահսկողության տակ անցած մարտական հենակետերը ռազմավարական տեսանկյունից ի՞նչ նշանակություն ունեն, միայն հայտնեց, թե 44-օրյա պատերազմից հետո որ ուղղությամբ ենք մարտական հենակետեր կորցրել։

«Դիրքային կորուստներ ունեցել ենք Ներքին Հանդի, Ջերմուկի, Իշխանասարի, Կապանի ուղղությամբ: Իսկ քանակական դիրքային՝ եթե կոնկրետ համարում են ջոկի դիրք, համարում են դասակի հենակետ, վաշտի հենակետ, դրանք տարբեր նշանակության կառույցներ են, և տերմինաբանությամբ կոնկրետ 50 թիվ ենք կորցրել, թե 60 թիվ ենք կորցրել, ես հստակ չեմ կարող պատասխանել»,- ասել էր Ասրյանը:

Ադրբեջանագետ Տարոն Հովհաննիսյանի խոսքով՝ սեպտեմբերյան երկօրյա մարտերի ընթացքում Ադրբեջանն օկուպացրել է հիմնականում բարձր լեռնային շրջաններ և դիրքավորվել։ Ըստ նրա՝ ռազմավարական տեսանկյունից  Ադրբեջանը մի շարք առավելություններ է ստացել

Ադրբեջանական կողմը խոչընդոտում է գյուղատնտեսական աշխատանքների իրականացմանը, կրակում է քաղաքացիների, տեխնիկայի վրա։ Ադրբեջանագետը նաև հիշեցնում է՝ թշնամին ՀՀ-ից օկուպացված տարածքներում ամրաշինական աշխատանքներ է իրականացնում։

Թուրքագետ Ռուբեն Մելքոնյանը կարծում է, որ ադրբեջանական կողմը հետ չի քաշվում, որովհետև հստակ նպատակադրում ունի՝ հետ քաշվելու համար ՀՀ-ից ցավոտ զիջումներ կորզել։

ԶՈՒ ԳՇ պետ Էդվարդ Ասրյանը երեկ պնդում էր, թե ադրբեջանական ուժերը Ջերմուկից որոշ չափով հետ են քաշվել, և այս պահին Ջերմուկի ուղղությամբ ունենք գծագրված առաջնագիծ։ Ջերմուկի փոխքաղաքապետ Վարդան Սարգսյանը Factor TV-ի հետ կարճ հեռախոսազրույցում միայն ասաց, որ բլրի վրա թշնամու խմբավորումներն անզեն աչքով տեսանելի չեն, և հորդորեց հետևել պաշտոնական լրահոսին։

Տարոն Հովհաննիսյանն ասում է՝ դա չի նշանակում, որ ադրբեջանական ուժերն այդ հատվածում դուրս են եկել Հայաստանի տարածքից։ Մասնագետներն էլ Բաքվի գործելաոճում Թուրքիայի ձեռագիրն են տեսնում։

Ադրբեջանը համառորեն չի ընդունում, որ օկուպացրել է ՀՀ սուվերեն տարածքը։ Իսկ թե որքան է կազմում այդ տարածքի մակերեսը, հստակ չէ։ ՀՀ ԱԺ Պաշտպանության և անվտանգության հարցերի հանձնաժողովի փոխնախագահ Արմեն Խաչատրյանը Սանկտ Պետերբուրգում ՀԱՊԿ խորհրդարանների Պաշտպանության հանձնաժողովների խորհրդակցության ժամանակ էր ասել, որ վերջին երկու տարում Ադրբեջանը 127 քառակուսի կիլոմետր տարածք է գրավել։ ԳՇ պետ Էդվարդ Ասրյանը երեկ ավելի մեծ թվի մասին խոսեց։

«Եթե հաշվարկները կատարվում են հակառակորդի առաջնագծից մեր համապատասխան խորություններում, որտեղ հակառակորդը հաջողություններ է ունեցել օկուպացնել մեր ինքնիշխան տարածքից, ապա դա կազմում է մոտ 130 և որոշակի ավելի տարածք, այսինքն՝ 127 շեշտված թիվը մոտ թիվ է այդ տարածքներին: Եթե մենք հաշվում ենք այդ տարածքների կորուստներն անմիջապես մեր առաջնագծից խորությամբ, ապա այդ թիվն ավելի քիչ է կազմում»,- նշել է Ասրյանը:

Ադրբեջանն օկուպացրած տարածքներից հետ կքաշվի միայն այդ դեպքում, եթե Հայաստանի կողմից լինեն ռազմական լուրջ ճնշումներ, կամ էլ քաղաքական ճնշում արտաքին խաղացողների կողմից՝ կարծում է ադրբեջանագետ Տարոն Հովհաննիսյանը։ Իսկ ուժային սցենարով խնդրի լուծման մասին ԶՈՒ ԳՇ-ում նախընտրում են առայժմ չխոսել։

Մանրամասները` տեսանյութում:

Արփի Հակոբյան