Քաղաքականություն
07.10.2022 | 14:41ԱԺ-ն արտահերթ նիստում ատգամավորները քննարկում են Կենտրոնական ընտրական հանձնաժողովի նախագահի ընտրության հարցըը։ ԿԸՀ նախագահի պաշտոնում «Քաղաքացիական պայմանագիր» խմբակցությունն առաջադրել է Վահագն Հովակիմյանի թեկնածությունը։
«Ես և Դուք «Քաղաքացիական պայմանագիր» կուսակցության հիմնադիր անդամներ ենք։ Դուք նաև վարչության անդամ եք։ Այն քաղաքական կենսագրությունը, որն ունեք, մարդկանց թույլ է տալիս հնչեցնելու գլխավոր քննադատությունը․ սա չի կաշկանդելո՞ւ ձեզ հետագայում որպես ԿԸՀ նախագահ ազատ աշխատելու հարցում։ Եթե ոչ, ապա որո՞նք են հիմնավորումները, որոնք ձեզ թույլ են տալու ազատ գործել՝ որպես ԿԸՀ ղեկավար»,- «Քաղաքացիական պայմանագիր» խմբակցության պատգամավոր Զարուհի Բաթոյանը ԿԸՀ նախագահի թեկնածուին այս հարցն ուղղեց։
Վահագն Հովակիմյանը պատասխանեց, որ ՀՀ Սահմանադրության համաձայն՝ ԿԸՀ անդամներն իրենց լիազորություններն իրականացնելիս իրավունք չունեն լինել քաղաքական ուժի անդամ, հրապարակային հայտարարություններում պետք է դրսևորեն քաղաքական զսպվածություն։
«Եթե սահմանադրի կամքը լիներ այն, որ ԿԸՀ նախագահ չի կարող լինել երբևէ կուսակցական գործունեություն ծավալած անձը, նկարիչը կամ երաժիշտը, ապա հենց այդպես էլ կսահմանվեր։
Իմ համոզմամբ՝ ցանկացած պաշտոնի համար եթե չկա իրավական խոչընդոտ, ապա անձը պետք է ընտրվի՝ իր սկզբունքներն ու կենսագրությունը հաշվի առնելով։
Կրկնում եմ, որ 98թ․-ից պայքարել եմ ազատ, արդար, թափանցիկ ընտրությունների համար։ Իմ սկզբունքներից չհրաժարվելու համար անգամ ֆիզիկական սպառնալիքների եմ ենթարկվել։ Եթե որևէ մեկը կապացուցի, որ կեղծիք եմ արել կամ հրաժարվել սկզբունքներիցս, ապա երբեք չէի հավակնի այս պաշտոնին, և ՔՊ-ն երբեք չէր առաջադրի իմ թեկնածությունը։
Ինձ պարտավորեցնում է այն, որ քաղհասարակությունն ինձ քննադատել է այս թեկնածության համար։ Նրանցից շատերի հետ ճանապարհ եմ անցել և ավելի հետևողական եմ լինելու նրանց հետ համագործակցելու ուղղությամբ, որպեսզի համատեղ ջանքերով ընտրական համակարգը լինի ավելի լավը, իսկ նրանց բարձրաձայնած խնդիրները լուծվեն»,- նշեց ԿԸՀ նախագահի թեկնածուն։
Հիշեցնենք, որ քաղաքացիական հասարակության կազմակերպություններն օրերս միասնական հայտարարությամբ մատնանշել են, որ դատապարտում են իշխող քաղաքական կուսակցության կողմից ԿԸՀ նախագահի պաշտոնում կուսակցական անդամին նշանակելու մոտեցումը։
«Ինձ պարտավորեցնում է այն, որ քաղհասարակությունն ինձ քննադատել է այս թեկնածության համար։ Նրանցից շատերի հետ ճանապարհ եմ անցել և ավելի հետեւողական եմ լինելու նրանց հետ համագործակցելու ուղղությամբ, որպեսզի համատեղ ջանքերով ընտրական համակարգը լինի ավելի լավը, իսկ նրանց բարձրաձայնած խնդիրները լուծվեն»,- նշեց Հովակիմյանը։
Մանրամասները՝ տեսանյութում։
