13.04.2026 | 19:19
Մալխաս Ամոյան․ Լավ մարզավիճակում եմ Եվրոպայի առաջնությունից առաջ, կփորձեմ նվաճել 5-րդ ոսկե մեդալը
Մակրոնը` քառակողմ հանդիպման արդյունքների մասին
Քաղաքականություն
07.10.2022 | 09:16
Ֆրանսիայի նախագահ Էմանուել Մակրոնը, որը միացել է «Շառլ Միշել-Նիկոլ Փաշինյան-Իլհամ Ալիև» հանդիպումների եվրոպական ձևաչափին, մինչև ուշ գիշեր տևած բանակցություններից տեղեկատվություն է հրապարակել։ Մակրոնն իր գրառումը վերնագրել է «Կովկասում կայուն խաղաղության համար»՝ ցույց տալու բանակցություններին նպաստելու ֆրանսիական կողմի նպատակադրումը։
Ֆրանսիայի նախագահը նշում է․ «Այսօր երեկոյան Հայաստանն ու Ադրբեջանը հաստատում են իրենց հավատարմությունը Միավորված ազգերի կազմակերպության Կանոնադրությանը և 1991 թվականի Ալմա-Աթայի հռչակագրին, որով փոխադարձաբար ճանաչում են իրենց տարածքային ամբողջականությունը և իրենց ինքնիշխանությունը»։
Էմանուել Մակրոնի հիշատակած Ալմա-Աթայի հռչակագիրը ԱՊՀ սկզբունքների և նպատակների մասին է, որով վերահաստատել է Բելովեժյան համաձայնագիրը՝ նշելով, որ ԱՊՀ կազմավորման հետ ԽՍՀՄ-ը դադարում է գոյություն ունենալ։
1991 թվականի դեկտեմբերի 21-ին Ալմա Աթայում կայացած նախագահների հանդիպման արդյունքում ԱՊՀ-ին բացի Բելառուսից, Ռուսաստանից և Ուկրաինայից միացել են ևս 8 հանրապետություններ, այդ թվում՝ Ադրբեջանն ու Հայաստանը, որոնք այդպիսով ճանաչել են միմյանց տարածքային ամբողջականությունը։ Ստացվում է՝ տարածքային ամբողջականության ճանաչման կետը վերահաստատումն է 1991-ի Ալմա-Աթայի հռչակագրի։
Էմանուել Մակրոնը տեղեկատվություն է հրապարակել նաև հայ-ադրբեջանական սահմանի վերաբերյալ․ «Հայաստանը համաձայն է նպաստել Եվրամիության քաղաքացիական առաքելության ստեղծմանը Ադրբեջանի հետ սահմանի երկայնքով, որը համաձայնում է համագործակցել։ Այս առաքելության նպատակը՝ վստահություն ձևավորել և նպաստել սահմանային հանձնաժողովներին»,- նշել է Մակրոնը։
Նշենք, որ հնադիպումից հետո Փաշինյանը, Ալիևը, Մակրոնը և Միշելը համատեղ հայտարարություն են տարածել։
