Հարավային Կովկասում մենք կանգնած ենք ապաշրջափակման վերացումից մեկ քայլ հեռավորության վրա․ Օվերչուկ

Հարավային Կովկասում տրանսպորտային ճանապարհների ապաշրջափակումը Ռուսաստանին շատ է պետք։ Այս մասին Երևանում կայացած Հայ-ռուսական միջտարածաշրջանային համաժողովում հայտարարել է ՌԴ փոխվարչապետ Ալեքսեյ Օվերչուկը, գրում է RG-ն։

Վերջինս նշել է, որ «տրանսպորտային մեկուսացման հաղթահարման, տարածաշրջանում տնտեսական և տրանսպորտային կապերի ապաշրջափակման հեռանկարները հզոր խթան կհաղորդեն ինչպես Հայաստանի, այնպես էլ Հարավային Կովկասի ողջ տարածաշրջանի և հարակից երկրների, այդ թվում՝ Ռուսաստանի զարգացմանը»։

«Ես արդեն խոսել եմ այդ մասին․ մեր գնահատականների համաձայն՝ ռուսական ներդրումների հոսքը կարող է կազմել մինչև 5 մլրդ դոլար։ Դրանք նախ և առաջ նախագծեր են էներգետիկայի, տրանսպորտի ու լոգիստիկային, ինչպես նաև արդյունահանող ու վերամշակող արդյունաբերությունը։ Դրա շուրջ կստեղծվեն նոր աշխատատեղեր, ինչպես նաև փոքր ու միջին բիզնեսի բազմաթիվ ձեռնարկություններ»,-հայտարարել է ռուս պաշտոնյան։

Վերջինիս խոսքով՝ ՀՀ տնտեսության համար ապաշրջափակման հարատև ազդեցությունն ակնհայտ է։

«Հայաստանը քաջ գիտակցում է, որ հետագա տնտեսական աճը զսպվում է տրանսպորտային շրջափակման պատճառով: Այսօր մենք կանգնած ենք դրա վերացումից մեկ քայլ հեռավորության վրա»,-հայտարարել է Ալեքսեյ Օվերչուկը։

Վերջինս նշել է, որ այդ խնդիրը լուծվում է Հայաստան-Ադրբեջան-Ռուսաստան եռակողմ ձևաչափով։

«Հենց այդ նպատակով՝ տարածաշրջանում տնտեսական և տրանսպորտային կապերի ապաշրջափակման համար, պետությունների ղեկավարների որոշմամբ ստեղծվել է աշխատանքային խումբ՝ Ադրբեջանի, Հայաստանի և Ռուսաստանի կառավարությունների ղեկավարների տեղակալների համատեղ նախագահությամբ։ Այս նպատակին հասնելը վճռորոշ քայլ կլինի, որպեսզի Հարավային Կովկասը լարվածության օջախից կայունության և տնտեսական բարգավաճման տարածաշրջանի վերածվի։ Այդ ճանապարհները Ռուսաստանին նույնպես շատ են պետք, քանի որ դրանք անցնելու են բարեկամ երկրների տարածքներով և ամբողջ երկարությամբ գնալու են դեպի բարեկամ երկրներ»,- հայտարարել է Օվերչուկը։

Տաթև Ֆռանգյան