27.02.2026 | 16:48
Ուկրաինան և ՌԴ-ն համաձայնության են եկել Զապորոժիեի ԱԷԿ-ի վերանորոգման համար տեղական հրադադարի շուրջ
ՌԴ դեսպանին կանչել են Ճապոնիայի ԱԳՆ՝ Ճապոնիայի հյուպատոսի ձերբակալությունից հետո
Քաղաքականություն
27.09.2022 | 18:32
Ճապոնիայի ԱԳ նախարարությունը կանչել է Տոկիոյում ՌԴ դեսպան Միխայիլ Գալուզինին։ Նրան խիստ բողոք են փոխանցել՝ կապված Վլադիվոստոկում Ճապոնիայի հյուպատոսի կալանավորման հետ։ ԱԴԾ-ն կիրակի ճապոնացի դիվանագետ Մոտոկի Տացունորիին մեղադրել է լրտեսության մեջ, գրում է VOA-ն։
Հայտարարության մեջ Ճապոնիայի ԱԳՆ ղեկավարը նշել է, որ Ռուսաստանից պահանջվում է պաշտոնապես ներողություն խնդրել հյուպատոսի կալանավորման համար։ Ճապոնացի նախարարն ասել է, որ դիվանագետը ոչ մի անօրինական գործողություններ չի կատարել, հայտնում է Kyodo Tsushin գործակալությունը։
ԱԴԾ-ն երկուշաբթի հայտնել է Տացունորիի կալանավորման մասին։ Ենթադրվում է, որ նա գումարի դիմաց գաղտնի տեղեկություններ է ստացել Ասիա-խաղաղօվկիանոսյան երկրների հետ Ռուսաստանի համագործակցության և ռուսական տնտեսության վրա պատժամիջոցների ազդեցության մասին։ ԱԴԾ մամուլի ծառայությունը տեսանյութ է տարածել, որում դիվանագետը սրճարանում փաստաթղթեր է ստանում, իսկ կալանավորվելուց հետո տեսախցիկի առաջ խոստովանում է անօրինական գործողությունները։
Տացունորին պերսոնա նոն գրատա է հայտարարվել և պետք է լքի Ռուսաստանը։ Ամենայն հավանականությամբ, Ճապոնիան դրա դիմաց կուղարկի նմանատիպ աստիճան ունեցող դիվանագետի։
Մոսկվայի և Տոկիոյի հարաբերությունները վերջին տարիների վատթարագույն վիճակում են. Ուկրաինա Ռուսաստանի ներխուժումից հետո Ճապոնիան միացավ Ռուսաստանի դեմ արևմտյան բազմաթիվ պատժամիջոցներին:
Տաթև Ֆռանգյան
