Եթե Ձեր աչքերը եռանկյունի են կամ քառակուսի, ինձ ասեք այդ մասին․ Թեհմինա Վարդանյանը՝ Արման Անտոնյանին․ ՏԵՍԱՆՅՈՒԹ

Երևանի ավագանու «Լույս» խմբակցության անդամ Թեհմինա Վարդանյանն այսօր ավագանու նիստի ընթացքում ներկայացրեց, թե ինչու է ինքը մի ամբողջ օր կտրվել աշխատանքից և առօրյայից ու հրավիրվել Չարենցավանի քննչական կոմիտե՝ բացատրություն տալու։ Ավագանու անդամը մեջբերեց իրեն ուղարկված ծանուցագրից մի հատված․ «2022 թվականի հունիսի 21-ի տեսագրությամբ պարզվել է, որ Դուք Արման Անտոնյանին ասում եք, որ վաղը, մյուս օրը նորից կլորացած աչքերով գալու եք նիստին և ասեք, թե ավագանու անդամների հանդեպ ոտնձգություններ են տեղի ունենում։ Ասացեք՝ ինչ եք նկատի ունեցել»։

Դիմելով Երևանի ավագանու անդամ Արման Անտոնյանին՝ Վարդանյանը նշեց․ «Հիմա, պարոն Անտոնյան, եթե ձեր աչքերը եռանկյունի են կամ ուղղանկյունի կամ քառակուսի, խնդրում եմ ինձ դրա մասին տեղյակ պահեք, զուտ տեղեկացրեք, ասեք՝ տիկի՛ն Վարդանյան, խնդրում եմ ինձ մի ասեք կլորացրած աչքեր, ասեք եռանկյունի աչքեր, դրա համար պետք չի ինձ հասցնել Չարենցավանի քննչական կոմիտե։ Ի տարբերություն ձեզ՝ ես պարապության սինդրոմով չեմ տառապում, ունեմ անձնական կյանք, ունեմ գործնական կյանք, և ի տարբերություն ձեզ ունեմ տարբեր տիպի զբաղմունքներ։ Ձեզ էլ խորհուրդ եմ տալիս շատ ավելի լուրջ բաներով զբաղվեք, չգիտեմ, որևէ զբաղմունք գտեք ձեզ, գնացեք լողի, սպորտի, հեծանիվ վարեք, ի վերջո գնացեք ասեղնագործության, գոբելենագործության, ինչ-որ զբաղմունք գտեք ձեզ համար, զբաղվեք»։

Երևանի քաղքապետ Հրաչյա Սարգսյանը հորդորեց անձնական փոխհարաբերությունները չպարզաբանել քաղաքապետարանի նիստերի դահլիճում։

Հիշեցնենք՝ 2021 թվականի օգոստոսի 2-ին ավագանու անդամները հայտարարություն տարածեցին, որ մի քանի դիմակավորված անձինք մահակներով և դանակներով ներխուժել են ավագանու անդամ Արման Անտոնյանի տուն, դաժան ծեծի են ենթարկել և դանակի 11 հարված հասցրել նրան։ Վնասվածքներ ստացել է ոչ միայն ավագանու անդամը, այլև նրա 87-ամյա պապը։

Մանրամասները՝ տեսանյութում։