12.01.2026 | 09:49
Թրամփը՝ «Վենեսուելայի նախագահի պաշտոնակատար»․ ԱՄՆ նախագահը truthsocial-ում լուսանկար է հրապարակել
Ադրբեջանում ձերբակալել են հակապատերազմական կոչեր հնչեցնող ակտիվիստին․ ԼՈՒՍԱՆԿԱՐ
Քաղաքականություն
20.09.2022 | 17:52
Ադրբեջանում ոստիկանները ձերբակալել են նախագահ Իլհամ Ալիևի քաղաքականությանն ու Հայաստանի դեմ նոր պատերազմի սանձազերծմանը դեմ արտահայվող ակտիվիստներից մեկին։ Ադրբեջանական անկախ լրատվականների ու ակտիվիստների փոխանցմամբ՝ Demokratiya1918 (D18) շարժման նախագահ Ահմադ Մամադլին փողոցում ձերբակալվել է քաղաքացիական հագուստով ոստիկանների կողմից։
Մամադլին Հայաստանի դեմ ադրբեջանական ագրեսիան դատապարտող հասարակական գործիչներից է։ Մասնավորապես, նա իր թվիթերյան էջում գրել էր, որ Իլհամ Ալիևը պատասխան է տալու իր բոլոր հանցագործությունների համար։
«Մի օր Իլհամ Ալիևը միջազգային դատարանների առաջ պատասխան է տալու իր կողմից կատարված բոլոր հանցագործությունների համար՝ ոչ միայն ադրբեջանական ժողովրդի, այլև հայ ժողովրդի դեմ։ Ժողովրդավար Ադրբեջանի առաջին խնդիրը լինելու է բոլոր նրանց պատժելը, որոնք ժողովուրդների միջև թշնամանք են սերմանում»,- գրել էր Մամադլին։
Հիշեցնենք, որ Ադրբեջանի իշխանությունները համացանցային արշավ են սկսել բոլոր այն գործիչների դեմ, որոնք դեմ են արտահայտվել Բաքվի վերջին ագրեսիային։ Մասնավորապես, իշխող «Յենի Ադրբեջան» կուսակցության ակտիվիստները համացանցում #xainitanı՝ «ճանաչեք դավաճաններին» հեշթեգն են տարածում՝ ընդդիմադիրների, բլոգերների, ակտիվիստների լուսանկարներով, որոնք դեմ են արտահայտվել Ադրբեջանի նախագահ Իլհամ Ալիևի վերջին ռազմական ագրեսիային, կասկածի տակ դրել ադրբեջանական գործողությունների նպատակահարմարությունը ու դեմ են արտահայտվել պատերազմին։ Բացի այդ, նրանց հասցեին նաև սպառնալիքներ են տարածվում։
Էմմա Չոբանյան
