02.03.2026 | 23:40
Հայաստանի մի շարք հասցեներում էլեկտրաներգիայի անջատումներ կլինեն
Թուրքիայի փոխնախագահը հայտարարել է, թե Փելոսիի հայտարարությունները «սաբոտաժի են ենթարկում տարածաշրջանում դիվանագիտական ջանքերը»
Քաղաքականություն
19.09.2022 | 19:04
Թուրքիայի փոխնախագահ Ֆուաթ Օքթայը քննադատել է ԱՄՆ Կոնգրեսի Ներկայացուցիչների պալատի նախագահ Նենսի Փելոսիի հայտարարությունները Հայաստան կատարած այցի ժամանակ։ Այս մասին հաղորդում է Անադոլուն։
Մասնավորապես, Օքթայը նշել է, որ Փելոսիի հայտարարությունները որևէ ընդհանուր բան չունեն պատմական փաստերի հետ, ինչպես նաև այսօրվա իրականությունների։
«ԱՄՆ Կոնգրեսի Ներկայացուցիչների պալատի խոսնակի հայտարարությունները նաև հեռու են բարի կամքի և օբյեկտիվության հասկացություններից։ Այս անընդունելի հայտարարությունները սաբոտաժի են ենթարկում տարածաշրջանում դիվանագիտական ջանքերը»,- նշել է Օքթայը թվիթերյան գրառմամբ։
Ըստ նրա՝ ամերիկյան վարչակազմը պետք է հստակ սահմանի՝ արդյո՞ք Փելոսիի և նրան ուղեկցող մի շարք հայամետ քաղաքական գործիչների հայտարարություններն արտացոլում են Վաշինգտոնի պաշտոնական դիրքորոշումը Ղարաբաղի հարցում։
«Այս փուլում, երբ Հարավային Կովկասն առավել, քան երբևէ կարիք ունի խաղաղության և կայունության, կոչ եմ անում միջազգային խաղացողներին՝ գործել առավելագույն կշռադատվածությամբ և արդարությամբ և, առաջին հերթին, պատասխանատվությամբ»,- գրել է Թուրքիայի փոխնախագահը՝ հավելելով, որ Անկարան շարունակելու է աջակցել Բաքվին։
Ուշագրավ է, որ Օթայն անհանգստանում է ԼՂ հակամարտության կարգավորման առնչությամբ Նենսի Փելոսիի հայտարարություններից։ Նենսի Փելոսին, ի դեպ, Երևանում կրկնել է ԼՂ հակամարտության վերաբերյալ ԱՄՆ վարչակազմի հայտարարությունները։
Էմմա Չոբանյան
