06.10.2026 | 11:18
Ազգային ժողովի հրմշտոցը՝ ԼՈՒՍԱՆԿԱՐՆԵՐՈՎ
Ալիևն օգոստոսին պարգևատրել է զոհված հայ զինծառայողի մարմինը խոշտանգողին. FIP
Քաղաքականություն
19.09.2022 | 15:30
Ադրբեջանի Պաշտպանության նախարարությունը սեպտեմբերի 17-ին հայտարարել էր հետաքննություն սկսելու մասին այն բանից հետո, երբ համացանցում տարածվեց հայ կին զինծառայողի մարմնի խոշտանգման տեսանյութը:
Ըստ հայտարարության՝ Ադրբեջանն ուսումնասիրում է ենթադրյալ անօրինական գործողությունները՝ «հայկական զինված ուժերի զինծառայողների մարմինների, ինչպես նաև գերի ընկած պրովոկատորների նկատմամբ անմարդկային վերաբերմունքի համար»։
Նման հայտարարություն Ադրբեջանի իշխանություններն արել էին նաև 44-օրյա պատերազմից հետո՝ 2020 թվականի դեկտեմբերին, երբ համացանցում տարածվեցին տեսանյութեր հայ զինվորների մարմինների, գերիների և քաղաքացիական անձանց խոշտանգումներից։
Ադրբեջանն անգամ հայտարարել էր այդ մարդկանց ձերբակալելու մասին։
Հայտնի են չորս ձերբակալված զինվորականների անունները՝ Գարդաշխան Աբիշով (Qardaşxan Abışov), Ռաշադ Ալիև (Rəşad Əliyev), Արզու Հուսեյնով (Arzu Hüseynov) և Ումիդ Աղաև (Ümid Ağayev)։
Գարդաշխան Աբիշովը և Ռաշիդ Ալիևը, ըստ պաշտոնական Բաքվի, Զանգելանի (Քաշաթաղ) շրջանում խոշտանգել էին հայ զոհված զինծառայողների մարմինները, տեսանկարահանել հեռախոսով և սոցիալական ցանցերի միջոցով ուղարկել այլ անձանց։ Արզու Հուսեյնովը և Ումիդ Աղաևը մեղադրվում էին հայկական գերեզմանաքարերը ոչնչացնելու համար։
Նախորդող երկու տարիների ընթացքում քրեական գործերի շարունակության մասին որևէ տեղեկություն չկար։
Այս տարվա օգոստոսին, սակայն, Գարդաշխան Աբիշովի անունը հայտնվեց Ադրբեջանի ՊՆ-ի մեկ այլ հայտարարության մեջ, այս անգամ՝ պարգևատրումների մասին։
Ադրբեջանի սահմանապահ ծառայության զինծառայողները պարգևատրվել էին օգոստոսի 18-ին՝ «Ադրբեջանի Հանրապետության սահմանները պաշտպանելու համար»։
