Պուտինը հայտարարել է, որ ռուսական ընկերությունների մեծ պատվիրակությունը հաջորդ շաբաթ կայցելի Իրան

Ռուսաստանի նախագահ Վլադիմիր Պուտինը հայտարարել է, որ հաջորդ շաբաթ Իրան կայցելի ռուսական 80 ձեռնարկությունների ներկայացուցիչներից կազմված պատվիրակություն։ Պուտինն այս մասին հայտարարել է հինգշաբթի օրը Ուզբեկստանի մայրաքաղաք Սամարղանդում ՇՀԿ-ի համաժողովի շրջանակում Իրանի նախագահ Իբրահիմ Ռաիսիի հետ հանդիպման ժամանակ, հայտնում է Tasnim news agency-ն։

Մոսկվան հայտնել է, որ «չափազանց ոգևորված է», որ Իրանը ցանկանում է միանալ Եվրասիական քաղաքական, տնտեսական և անվտանգության միությանը, որը ներառում է Չինաստանը, Ռուսաստանը, Հնդկաստանը, Պակիստանը և Կենտրոնական Ասիայի նախկին խորհրդային չորս երկրներ։

«Ինչպես պայմանավորվել ենք ձեզ հետ՝ մենք ամեն ինչ արել ենք, որպեսզի Իրանը դառնա Շանհայի համագործակցության կազմակերպության լիիրավ անդամ: Այս կազմակերպության մեր գործընկերներն աջակցել են ձեր դիմումին, մնում է միայն մի վերջին ձևականություն: Դա իսկապես ձևականություն է, և Իրանը միանում է արդեն իսկ լուրջ, մեծ ու հեղինակավոր միջազգային կազմակերպությանը։ Եվ մենք շատ ուրախ ենք դրա համար»,- ասել է Պուտինը։

Ռուսաստանի նախագահն ընդգծել է, որ Մոսկվայի և Թեհրանի դիրքորոշումները շատ միջազգային հարցերում մոտ են կամ համընկնում են՝ ասելով. «Միջտարածաշրջանային կապերը զարգանում են։ Մենք ակտիվորեն համագործակցում ենք միջազգային ասպարեզում և շատ [կետերում] մեր դիրքորոշումները մոտ են կամ, ինչպես ասում են դիվանագետները, համընկնում են»։

Իրանի նախագահը, իր հերթին, ասել է, որ Իսլամական Հանրապետությունը «լրջորեն հաստատակամ է զարգացնել երկկողմ ռազմավարական հարաբերությունները» Ռուսաստանի հետ քաղաքականության, տնտեսության, առևտրի և օդատիեզերական ոլորտում՝ հավելելով, որ ԱՄՆ-ի կողմից պատժամիջոցների ենթարկված երկրների համագործակցությունը նրանց կդարձնի «ավելի ուժեղ»:

Տաթև Ֆռանգյան