Քննարկել ենք ռազմական դրություն հայտարարելու նպատակահարմարությունը. Նիկոլ Փաշինյան․ ՏԵՍԱՆՅՈՒԹ

Մենք պետք է արձանագրենք, որ իրադրությունը շարունակում է մնալ լարված և անվտանգության խորհրդի ֆորմատով քննարկել ենք ՀՀ-ում ռազմական դրություն մտցնելու նպատակահարմարությունը և եկել ենք եզրակացության, որ այս պահին նման որոշման պետք է չգնանք: Այս մասին այսօր կառավարության նիստում հայտարարեց վարչապետ Նիկոլ Փաշինյանը:

«Բայց մյուս կողմից մենք նաև բազմաթիվ քաղաքացիներից առաջարկներ ենք ստանում: Նաև կան քաղաքացիներ, որոնք ասում են՝ ռազմական դրության էինք սպասում, որ մասնակցենք մեր երկրի ինքնիշխանության, տարածքային ամբողջականության պաշտպանությանը: Անվտանգության խորհրդի նիստում դա էլ ենք քննարկել և եկել այն եզրակացության, որ եթե կան մարդիկ, որոնք ուզում են ներգրավված լինել, կարող են սովորական ընթացակարգով կամավորության հիմքով դիմել զինկոմիսարիատներ, և այդ խնդիրը կլուծվի: Նախկինում կայացրած որոշումների շրջանակներում եռամսյա հավաքների գործընթացը շարունակական է, ուժի մեջ է: Կան բոլոր օրենսդրական հիմքերը, կամավորության հիմունքներով քաղաքացիներին ներգրավել ծառայության մեջ»,- նշեց վարչապետը:

Պաշտպանության նախարար Սուրեն Պապիկյանը հավելեց, որ թե՛ «Աշխարհազորի մասին» օրենքը, թե՛ եռամսյա հավաքների կառավարության որոշումները և «Պաշտպանության մասին» օրենքը այդ հնարավորությունները տալիս են։ «Բոլոր այն քաղաքացիները, որոնք ուզում են այսօր կամավորության հիմունքներով զինվորագրվել և գնալ պատրաստության, անհրաժեշտության դեպքում նրանց կիրռելիությունն ապահովելու համար, զինկոմիսարիատները պատրաստ են նրանց ընդունել և տեղորոշել ըստ վայրերի»,- նշեց նախարարը։

Մանրամասները՝ տեսանյութում։