Որևէ բանի կարիք չկա․ աջակցության նախաձեռնությունները հաճախ գցում են բանակի վարկը․ Պապիկյան․ ՏԵՍԱՆՅՈՒԹ

Արդյոք ՊՆ-ն ի վիճակի՞ է ապահովելու մեր բանակի կարիքները, թե օգնության անհրաժեշտություն կա։  ԱԺ-Կառավարություն հարցուպատասխանի ժամանակ պաշտպանության նախարար Սուրեն Պապիկյանին այս հարցն ուղղեց ՀՀ ԱԺ նախագահ Ալեն Սիմոնյանը։

«Այս փուլում, երբ հայտարարված չէ որևէ մոբիլիզացիա, մենք որևէ խնդիր չունենք ապահովելու մեր անձնակազմին: Խնդրում եմ ուղղակի ինքնագործունեությամբ չզբաղվել. եթե կա մեծ ցանկություն ինչ-որ բանով աջակցել, լինել բանակի կողքին՝ կապվել պատկան մարմինների հետ: Ես հանձնարարել եմ ՊՆ մամուլի խոսնակին հարթակ, հնարավորություն ստեղծել, որ մարդիկ կապվեն իր հետ և հնարավորության  պարագայում իրենց բարոյական աջակցությունը հայտնեն: Եթե կարիք կլինի այլ հարցերով համագործակցել, մենք պատրաստ ենք համագործակցել բոլորի հետ, բայց մեզ անհրաժեշտ հարցերի շուրջ միայն:

Շնորհակալ եմ աջակցության համար, շնորհակալ եմ պատրաստակամության համար, բայց այդ աջակցության նախաձեռնությունները հաճախ գցում են բանակի վարկը, և ես կխնդրեմ ձեռնպահ մնալ նմանատիպ ինքնագործունեությունից»,- նշեց  Պապիկյանը՝ հավելելով, որ այս պահի դրությամբ զրահաբաճկոնների, վրանների, սննդի, հագուստի կարիք մեր զինվորականները չունեն, բոլոր անհրաժեշտ պարագաները ձեռք է բերում Պաշտպանության նախարարությունը:

Նշենք, որ ավելի վաղ ՊՆ-ից հայտնել էին, որ ադրբեջանական ռազմական ագրեսիայի ֆոնին հաճախակի են դարձել դեպքերը, երբ բազմաթիվ քաղաքացիներ և մասնավոր ընկերություններ, փորձելով օգտակար լինել մարտական գործողությունների ընթացքում վիրավորում ստացած զինծառայողներին, սեփական նախաձեռնությամբ տարբեր դեղամիջոցներ, սնունդ են ձեռք բերում՝ այն զինվորական հոսպիտալներին փոխանցելու նպատակով։

Մանրամասները՝ տեսանյութում։