Քաղաքականություն
09.09.2022 | 18:22
Քննարկվում է այս ամսվա վերջին ԱՄՆ նախագահ Ջո Բայդենի և Թուրքիայի նախագահ Ռեջեփ Թայիփ Էրդողանի հանդիպումը կազմակերպելու հարցը։ Այս մասին Reuters-ին հայտնել է թուրք բարձրաստիճան պաշտոնյան՝ նշելով, որ հանդիպման օրակարգում են Թուրքիա-Ռուսաստան հարաբերությունները, ԱՄՆ-ից զենքի գնումը, Ուկրաինայում և Սիրիայում հակամարտությունները:
Բայդենն ու Էրդողանը վերջին անգամ հանդիպել են հունիսի վերջին՝ Մադրիդում ՆԱՏՕ-ի գագաթնաժողովի շրջանակում, որտեղ Թուրքիան չեղարկեց իր վետոն դաշինքին Ֆինլանդիայի և Շվեդիայի անդամակցության հետ կապված։
«Այդ գագաթնաժողովի ավարտին Բայդենն ասել էր, որ Միացյալ Նահանգներն աջակցում է Թուրքիային F-16 կործանիչների վաճառքին, և որ ինքը վստահ է՝ Կոնգրեսի համաձայնությունը, որն անհրաժեշտ է դրանց վաճառքի համար, կարող է ստանալ։ Բայդենի հետ վերջին հանդիպումից հետո ԱՄՆ վարչակազմը քայլեր է ձեռնարկել, քանի որ մենք պահանջել էինք որոշ կարևոր հարցերի շուրջ, ինչպիսիք են F-16-ները: Կարծում եմ, որ նման թեմաներ կլինեն»,- ասել է թուրք բարձրաստիճան պաշտոնյան։
Նա նշել է, որ երկու երկրների ղեկավարների բանակցությունները ներառելու են Ուկրաինայում պատերազմը, Թուրքիայի և ՌԴ-ի հարաբերությունները, հացահատիկային գործարքը։ Անկարայի ու Աթենքի միջև լարված հարաբերությունները, հավանաբար, նույնպես կքննարկվեն։
Էմմա Չոբանյան
