Լատվիայի Սեյմն օրենք է ընդունել Մոսկվայի պատրիարքությունից Լատվիայի Ուղղափառ եկեղեցու անկախության մասին

Լատվիայի Սեյմը հավանություն է տվել Լատվիայի Ուղղափառ եկեղեցու մասին օրենքում փոփոխություններին, որոնց համաձայն՝ այն ամբողջովին անկախանում է Մոսկվայի պատրիարքության Ռուս ուղղափառ եկեղեցուց։ Այս մասին հայտնում է կառավարության մամուլի ծառայությունը, փոխանցում է Daily afisha-ն։

Օրինագիծը ներկայացրել է Լատվիայի նախագահ Էգիլս Լևիցը։ Այն դիտարկվել է հրատապ կարգով։ Օրենքն ուժի մեջ է մտնում հրապարակմանը հաջորդող օրվանից։

Նշվում է, որ մինչև հոկտեմբերի 1-ը եկեղեցին պետք է տեղեկություն տրամադրի այն մասին, թե ովքեր են զբաղեցնելու Լատվիայի Ուղղափառ եկեղեցու ղեկավարի, մետրոպոլիտների, արքեպիսկոպոսների և եպիսկոպոսների պաշտոնները։ Մինչև հոկտեմբերի 31-ը պետք է պատրաստ լինի նոր կանոնադրությունը։

«Սեյմը հրատապ փոփոխություններ է ընդունել Լատվիայի Ուղղափառ եկեղեցու մասին օրենքում՝ հաստատելով Լատվիայի Ուղղափառ Եկեղեցու լիակատար անկախությունը՝ իր բոլոր թեմերով, ծխերով և հաստատություններով Լատվիայից դուրս գտնվող ցանկացած եկեղեցու իշխանությունից (ավտոկեֆալ եկեղեցի)»,- ասված է հայտարարության մեջ։

Լատվիայի Սեյմի պատգամավոր Արտուս Կաիմիշը նշել է, որ օրենքի ընդունմամբ «ամրապնդվել է Լատվիայի Ուղղափառ եկեղեցու պատմականորեն գոյություն ունեցող ինքնավարությունն ու անկախությունը»։ Նրա խոսքով՝ նման որոշումը բխում է լատվիական ուղղափառության, ողջ ժողովրդի և ազգային անվտանգության շահերից։

Մեկնաբանելով որոշումը՝ Մոսկվայի պատրիարքարանի արտաքին եկեղեցական հարաբերությունների վարչությունը հայտնել է, որ ինքնավարություն (այսինքն՝ եկեղեցական անկախություն) կարող է շնորհել միայն Ռուս ուղղափառ եկեղեցին, որը հանդիսանում է «մայր եկեղեցի»։

Տաթև Ֆռանգյան