Անհատական դասացուցակ, դպրոցների ֆինանսավորում՝ ըստ դասարանների թվի. ի՞նչ է սպասվում նոր չափորոշիչով․ ՏԵՍԱՆՅՈՒԹ

Վաղը կմեկնարկի ուսումնական նոր տարին․ Հայաստանում առաջին դասարան կհաճախի շուրջ 40 հազար երեխա: Ի՞նչ նորամուծությունների կհանդիպեն առաջին անգամ դպրոց ոտք դնող փոքրիկներն ու ավագ դասարանների աշակերտները․ ԿԳՄՍՆ ներկայացուցիչներն այսօր ավագ դպրոցների տնօրենների, փոխտնօրենների հետ խորհրդակցության ժամանակ քննարկում էին նոր ուսումնական տարվա նախապատրաստական աշխատանքները, հանրակրթության նոր չափորոշիչով նախատեսված այն փոփոխությունները, որոնք ուժի մեջ կմտնեն առաջիկայում։

Նախ՝ կփոխվի դպրոցների ֆինանսավորման կարգը։ ԿԶՆԱԿ-ի տնօրենի պաշտոնակատար Արտաշես Թորոսյանի խոսքով՝ դպրոցի ֆինանսավորումը որևէ կերպ կապված չի լինելու աշակերտների թվի հետ։ Մանկավարժները վարձատրվելու են նաև խմբակների և ուսումնական նախագծերի համար, որոնք առանձին տարիֆիկացվելու, հաշվարկվելու են ուսուցչի ծանրաբեռնվածության մեջ։ Ուսուցչի շաբաթական դասաժամերի քանակը կրճատվելու է։

ԿԳՄՍ նախարարի տեղակալ Ժաննա Անդրեասյանը նշում է՝ եթե հիմա ուսուցիչը պարտավոր է դասավանդել շաբաթական 22 ժամ, որպեսզի համարվի, որ նա աշխատում է մեկ դրույքով, ապա նոր չափորոշիչով մեկ դրույք ունենալու համար բավական է տարրական դասարանում դասավանդել 18, իսկ միջին և ավագ դասարաններում՝ 20 ժամ։

Հաջորդ փոփոխությունն առնչվում է ավագ դասարաններում անհատականացված դասացուցակի հնարավորությանը։ 10-12-րդ դասարաններում պետական պարտադիր բաղադրիչից զատ՝ սովորողները մասնագիտական նախասիրություններին համարժեք դասացուցակ կազմելու հնարավորություն կստանան։ Այսինքն՝ այլևս չի լինի, օրինակ՝ 10ա, 10բ դասարան։

Որոշվել է նաև հրաժարվել բազմահամակազմ դասարանների ուսուցումից, ինչը, ըստ նախարարության, նպատակային չէ և խոչընդոտում է ուսումնական գործընթացի պատշաճ կազմակերպմանը:

«Հանրակրթության մասին» օրենքում կատարված փոփոխություններից մեկն էլ առնչվում է հատուկ դպրոցների՝ ռեսուրս-կենտրոնների վերակազմակերպմանը։ Հանրապետական մանկավարժահոգեբանական կենտրոնի տնօրեն Արաքսյա Սվաջյանի խոսքով՝ հատուկ դպրոցներն ունեն կադրեր, որոնք կարող են իրենց փորձով կիսվել հանրակրթական դպրոցների հետ։

Հանրակրթական նոր չափորոշիչների ներդրման ծրագիրը մեկնարկել է 2021 թվականից։ Չափորոշիչն արդեն փորձարկվել է Տավուշի մարզի հանրակրթական դպրոցների 2-րդ, 5-րդ, 7-րդ և 10-րդ դասարաններում: Ծրագրի շրջանակում աջակցություն է տրվել ուսուցիչներին՝ անցնելու նոր չափորոշիչներով դասավանդմանը, ինչպես նաև վեր հանելու նոր մշակված առարկայական նյութերում առկա և հնարավոր խնդիրներն ու բացերը։

Մանրամասները՝ տեսանյութում։

Աննա Բաբաջանյան