Մերցը ներկայացրել է Գերմանիայի կառավարության անդամների թեկնածուներին․ ապագա ԱԳ նախարարը կողմ է, որ Կիևը գերմանական զենքերով հարվածի ՌԴ-ում թիրախներին

Գերմանիայի հավանական ապագա կանցլեր, Քրիստոնեա-դեմոկրատական ​​միության (ՔԴՄ) առաջնորդ Ֆրիդրիխ Մերցը երկուշաբթի հրապարակել է ապագա կաբինետի կազմը՝ ներկայացնելով իր կուսակցության նախարարներին, գրում է DW-ի ռուսական ծառայությունը։

62-ամյա Յոհան Վադեֆուլը, որը, մասնավորապես, հանդես էր գալիս Կիևին գերմանական զենքի օգտագործումը թույլ տալու օգտին՝ ռուսական տարածքում գտնվող թիրախներին հարվածելու համար, առաջադրվել է Գերմանիայի արտաքին գործերի նախարարի պաշտոնում։

«Չկա որևէ արդարացում՝ ո՛չ միջազգային իրավական, ո՛չ քաղաքական մակարդակով, թե ինչու Ուկրաինային չի թույլատրվում հարձակվել Ռուսաստանում գտնվող թիրախների վրա»,- «Tagesspiegel» թերթին տված հարցազրույցում ընդգծել էր Վադեֆուլը, որը «Պետերբուրգյան երկխոսության» նախկին խորհրդի անդամ է։

Նա մասնագիտությամբ իրավաբան է, մեծացել է Գերմանիայի հյուսիսում՝ Շլեզվիգ-Հոլշտայնի դաշնային երկրամասում։ Նա եղել է նահանգային խորհրդարանի անդամ, 2009 թվականից՝ Բունդեսթագի անդամ։ Վերջերս Վադեֆուլն Արտաքին քաղաքականության, Պաշտպանության և ԵՄ հարցերով կոմիտեների անդամ էր։ Նա ուղեկցել է Մերցին 2024 թվականի վերջին Կիև կատարած ուղևորության ժամանակ։ Վադեֆուլը համարվում է Մերցի մտերիմ ընկերն ու վստահելի անձը և վաղուց խորհրդատվություն է տրամադրում հավանական ապագա կանցլերին արտաքին քաղաքականության հարցերով։ Նա նաև լավ կապեր ունի միջազգային դիվանագիտական ​​շրջանակներում և վերջին շաբաթներին մի շարք հանդիպումներ է ունեցել ԵՄ արտաքին գործերի նախարարների հետ Փարիզում, Լոնդոնում և Վարշավայում։

Գերմանիայի նոր էկոնոմիկայի նախարարը կլինի 51-ամյա Կատերինա Ռայխեն, որը կվերադառնա քաղաքականություն 2020 թվականի սկզբից՝ զբաղեցնելով Westenergie-ի՝ եվրոպական էներգետիկ հսկա E.ON-ի դուստր ձեռնարկության գործադիր տնօրենի պաշտոնը։ 1998-ից 2015 թվականներին նա Գերմանիայի խորհրդարանի անդամ էր՝ ներկայացնելով Բրանդենբուրգ երկրամասը, որտեղ ծնվել է։ Ռեյխեն նաև խորհրդարանական քարտուղարի պաշտոններ է զբաղեցրել Շրջակա միջավայրի և Տրանսպորտի նախարարություններում։

Բունդեսթագում Քրիստոնեա-սոցիալիստական միության (ՔՍՄ)՝ ՔԴՄ քույր կուսակցության նահանգային խմբակցության ղեկավար, 54-ամյա Ալեքսանդր Դոբրինդտն առաջադրվել է Գերմանիայի ներքին գործերի նախարարի պաշտոնում։ Նա արդեն իսկ աշխատել է երկրի կառավարությունում՝ Գերմանիայի կանցլեր Անգելա Մերկելի երրորդ ժամկետի ընթացքում՝ 2013-2017 թվականներին, զբաղեցրել է տրանսպորտի նախարարի պաշտոնը։ Մասնագետները նշում են, որ Դոբրինդտը վերջին շաբաթների ընթացքում կարևոր դեր է խաղացել կոալիցիոն բանակցություններում՝ ներկայացնելով Քրիստոնեա-սոցիալիստական միությունը Բավարիայի վարչապետ Մարկուս Սյոդերի հետ միասին։ Նա ներքին գործերի նախարարի պաշտոնում կփոխարինի սոցիալ-դեմոկրատ Նենսի Ֆեյզերին, որին մի ժամանակ անվանել էր «տրոյական ձի, որը սրել է միգրացիոն ճգնաժամը»։

Թվայնացման և արդիականացման նորաստեղծ նախարարությունը կարող է գլխավորել 55-ամյա Կարստեն Վիլդբերգերը, որը մասնագիտությամբ ֆիզիկոս է։ Նա Գերմանիայի ամենամեծ էլեկտրոնային մանրածախ առևտրի Media Markt/Saturn խմբի տնօրենների խորհրդի նախագահն է և Ceconomy AG-ի կառավարման խորհրդի նախագահը։ Վիլդբերգերը նախկինում աշխատել է E.ON, Telstra և Vodafone ընկերությունների տնօրենների խորհուրդներում։ 2003-2006 թվականներին նա աշխատել է Deutsche Telekom-ում, 1998-2003 թվականներին զբաղեցրել է կառավարման խորհրդատուի պաշտոնը Boston Consulting Group-ում։ Նոր գործակալությունը, ինչպես սպասվում է, պատասխանատու կլինի արհեստական ​​բանականության ներդրման և Գերմանիայում ինտերնետային կապի համար լայնաշերտ մանրաթելային օպտիկամանրաթելային մալուխների օգտագործման ընդլայնման համար։

56-ամյա Պատրիկ Շնիդերը պատրաստվում է դառնալ Գերմանիայի տրանսպորտի նոր նախարար։ 2009 թվականից նա Գերմանիայի խորհրդարանի անդամ է, որից առաջ աշխատել է որպես իրավաբան։ 2018 թվականից ի վեր նա առաջատար դեր է խաղացել Բունդեսթագի պահպանողական դաշինքի խմբակցությունում։

Առողջապահության նախարարի պաշտոնում առաջադրվել է 2018 թվականից ի վեր ՔԴՄ կուսակցության 45-ամյա պատգամավոր Նինա Վարկենը։ Նա COVID-19 համավարակի ընթացքում իրավիճակին հետևող խորհրդարանական խմբի անդամ է եղել։

Լրագրող և մեդիա ձեռնարկատեր Վոլֆրամ Վայմերը կդառնա Գերմանիայի մշակույթի և լրատվամիջոցների հարցերով պետական ​​նախարար։ Վայմերը ՔԴՄ անդամ չէ, բայց մոտ է կուսակցությանը և Մերցի ընկերն է։ Վոլֆրամ Վայմերը կփոխարինի Կլաուդիա Ռոթին։

51-ամյա Թորստեն Ֆրեյն առաջադրվել է Դաշնային կանցլերի աշխատակազմի ղեկավարի պաշտոնում։ Խոսքը Գերմանիայի կաբինետի հաջորդ ղեկավարի աջ ձեռքի մասին է։ Ֆրեյը, որը մասնագիտությամբ իրավաբան է, վերջերս Բունդեսթագում զբաղեցրել է ՔԴՄ/ՔՍՄ խմբակցության առաջին խորհրդարանական ղեկավարի պաշտոնը։ Նա պատասխանատու կլինի կառավարության անխափան գործունեության և դաշնային նահանգների հետ դրա փոխգործակցության համար։

Բունդեսթագի արտահերթ ընտրություններից վեց շաբաթ անց պահպանողական ՔԴՄ/ՔՍՄ և Սոցիալ-դեմոկրատական ​​կուսակցությունների դաշինքը ապրիլի 9-ին հայտարարեց, որ համաձայնություն է ձեռք բերվել ավելի քան 140 էջանոց կոալիցիոն համաձայնագրի շուրջ։

Մինչ Ֆրիդրիխ Մերցը կարող է ստանձնել Գերմանիայի վարչապետի պաշտոնը, կոալիցիոն համաձայնագիրը պետք է հաստատվի կուսակցությունների կողմից։ ՔԴՄ փոքրամասնության համագումարի պատվիրակները միաձայն աջակցել են նրան։ Սոցիալ-դեմոկրատական ​​կուսակցության անդամների շրջանում հարցումը սկսվել է ապրիլի 15-ին և կտևի մինչև ապրիլի 29-ը։ Քրիստոնեա-սոցիալական միությունը համաձայնագիրը հաստատել է ապրիլի 10-ին։

Թարգմանությունը՝ Էմմա Չոբանյանի