25.11.2024 | 23:30
Էրդողանը ծրագրում է հաջորդ ժամկետով գրավել իշխանությունը․ TIME-ի անդրադարձը
Կիպրոսի ԱԳՆ-ն բողոք է հայտնել Իլհամ Ալիևի և Հյուսիսային Կիպրոսի ղեկավարի հանդիպման առնչությամբ
Քաղաքականություն
11.08.2022 | 20:39
Կիպրոսի Հանրապետության ԱԳՆ-ն հայտարարություն է տարածել՝ բողոք հայտնելով Ադրբեջանի նախագահ Իլհամ Ալիևի և Հյուսիսային Կիպրոսի ինքնահռչակ հանրապետության նախագահ Էրսին Թաթարի հանդիպման կապակցությամբ, որը տեղի է ունեցել թուրքական Քոնիա քաղաքում։
«Արտաքին գործերի նախարարությունը հիասթափություն և դժգոհություն է հայտնում օկուպանտ ղեկավարի հետ Ադրբեջանի նախագահի վերջին հանդիպման ինչպես նաև Էրսին Թաթարին Հյուսիսային Կիպրոսի թուրքական հանրապետության նախագահ ներկայացնելու կապակցությամբ»,- ասվում է ԱԳՆ հայտարարության մեջ։
Նշվում է, որ այս գործողությունը հակասում է Կիպրոսի վերաբերյալ ՄԱԿ-ի Անվտանգության խորհրդի բանաձևերի ոգուն և տառին, Կիպրոսի Հանրապետությունը ճանաչված է որպես Կիպրոսի միակ պետություն:
«Բացի այդ, կոնկրետ այս քայլով ադրբեջանական կողմն անտեսում է ԵՄ ինստիտուցիոնալ շրջանակը, որի հետ ձգտում է ինստիտուցիոնալ հարաբերությունների մեջ մտնել՝ գործընկերության համաձայնագրի ստորագրման միջոցով, որի ստորագրման համար, ինչպես հայտնի է, պահանջվում է նաև Կիպրոսի Հանրապետության համաձայնությունը»,- ասվում է հայտարարության մեջ։
Հաղորդվում է, որ ԱԳ նախարար Իոաննիս Կասուլիդիսն արդեն հանձնարարել է տարբեր մակարդակներով բողոքներ ներկայացնել՝ փոխանցելու այս իրադարձությունների վերաբերյալ դժգոհությունն ու հիասթափությունը։
Հիշեցնենք, որ Արցախյան 44-օրյա պատերազմից հետո Բաքուն բավական սերտ կապեր է հաստատել Թուրքիայի կողմից վերահսկվող Հյուսիսային Կիպրոսի հետ։ Անցյալ տարի էլ Ադրբեջանի խորհրդարանական պատվիրակությունն առաջին անգամ այցելել էր Հյուսիսային Կիպրոս։
Էմմա Չոբանյան
