06.10.2026 | 11:18
Ազգային ժողովի հրմշտոցը՝ ԼՈՒՍԱՆԿԱՐՆԵՐՈՎ
Ով է վառելիքի ներկրմամբ զբաղվող գործարար Կամո Մելքոնյանը, որից Դատախազությունը ենթադրյալ ապօրինի գույք է ուզում բռնագանձել
Հասարակություն
10.04.2025 | 13:08
Գլխավոր դատախազությունն այսօր հայտարարություն է տարածել, որ Հակակոռուպցիոն դատարանը վարույթ է ընդունել ապօրինի ծագում ունեցող գույքի բռնագանձման վերաբերյալ հերթական հայցադիմումը:
Ուշագրավն այն է, որ այս անգամ խոսքը վերաբերում է գործարար անձի, ոչ թե նախկին կամ ներկա պաշտոնյայի։ Դատախազությունից Factor.am-ին պարզաբանեցին, որ «Ապօրինի ծագում ունեցող գույքի բռնագանձման մասին» ՀՀ օրենքը գործում է նաև նման դեպքերում։
Factor.am-ն արդեն տեղեկացրել էր, որ Գլխավոր դատախազության ապօրինի ծագում ունեցող գույքի բռնագանձման գործերով վարչությունը պահանջ է ներկայացրել դատարանին՝ վառելիքի ներկրմամբ զբաղվող սահմանափակ պատասխանատվությամբ ընկերության սեփականատեր Կամո Մելքոնյանից և նրան փոխկապակցված անձանցից հօգուտ Հայաստանի Հանրապետության բռնագանձել՝
- 14 անշարժ գույք, որից 10-ը՝ Երևանում, 4-ը՝ մարզերում.
- Երևանում գտնվող 6 անշարժ գույքի գնման իրավունք.
- 6 տրանսպորտային միջոց.
- 4 իրավաբանական անձանցում մասնակցություն.
- 59 միլիոն 518 հազար դրամ՝ որպես ապօրինի եկամտի և միջոցների մնացորդ։
Կամո Մելքոնյանը տասնյակ տարիներ «Մաքս Օիլ» և «Կամօյլ» ՍՊԸ-ների տնօրենն է, նաև՝ վերջինի սեփականատերը։ Նա ՀՀԿ-ական նախկին պատգամավոր Հարություն Փամբուկյանի բիզնես-գործընկերն է։ Փամբուկյանին է պատկանում «Մաքս Օիլ»-ը։
Factor TV-ն «Վտանգավոր և անօրինական. Երևանում 63 բենզալցակայան գործում է առանց թույլտվության» և «Օրենքից վեր կանգնածները․ ովքեր են ապօրինի գործող բենզալցակայանների հետևում» փաստաքննություններում անդրադարձել էր նաև այս ընկերությունների գործունեությանը։
Գայանե Խաչատրյան
