20.12.2025 | 12:59
Գործարկվել է ՆԳՆ միգրացիայի և քաղաքացիության ծառայության նոր կայքը
ՌԴ-ն մտադիր է 1,5 մլրդ դոլար հատկացնել Իրանին Աստարա-Ռեշտ երկաթուղին կառուցելու համար
Քաղաքականություն
26.07.2022 | 21:35
Մոսկվան մինչև 2030 թ-ը կարող է 1,5 միլիարդ դոլար հատկացնել «Հյուսիս-Հարավ» միջազգային տրանսպորտային միջանցքի զարգացման համար, որը Ռուսաստանը կապում է Հնդկաստանի հետ Իրանի միջոցով: Այս մասին հայտնում է Ведомости-ն՝ հղում անելով տրանսպորտի նախարարությանն ու գերատեսչությանը մոտ կանգնած իր աղբյուրին, գրում է Gazeta-ն։
Նշվում է, որ «Ռուսական երկաթուղիներ» ընկերությունը մասնակցելու է Ադրբեջանի Աստարա քաղաքից մինչև Իրանի Ռեշտ քաղաք երկաթգծի կառուցմանը և Իրանում Գերմսար-Ինչե-Բուրուն գծի (495 կմ) էլեկտրաֆիկացմանը: Հայտնի է, որ ներկայում Աստարայի ու Ռեշտի միջև բեռները փոխադրվում են ավտոմոբիլային ճանապարհով։
Միջազգային տրանսպորտային այս միջանցքը մուլտիմոդալ երթուղի է ուղևորների և բեռների փոխադրման համար։ Այն սկիզբ կառնի Սանկտ Պետերբուրգից և կձգվի մինչև հնդկական Մումբայ նավահանգիստ՝ 7200 կմ։ Ծրագիրը նախատեսվում է ամբողջությամբ կյանքի կոչել մինչև 2030 թ։ «Հյուսիս-Հարավը» ՌԴ-ի համար ավելի մեծ կարևորություն է ձեռք բերել հատկապես ուկրաինական պատերազմի ու Արևմտյան հակառուսական պատժամիջոցների ֆոնին։
Նախորդ շաբաթ Թեհրան կատարած այցի ժամանակ ՌԴ նախագահ Վլադիմիր Պուտինը այս հարցը քննարկել էր նաև Իրանի նախագահ Էբրահիմ Ռաիսիի հետ։ Նախագահների այս քննարկումից հետո էլ ՌԴ ԱԳ նախարար Սերգեյ Լավրովը զանգահարել էր Ադրբեջանի ԱԳ նախարար Ջեյհուն Բայրամովին։ Զրույցի առանցքային թեմաներից մեկը եղել էր հենց տրանսպորտային այս միջանցքը։
Ադրբեջանի ԱԳՆ-ն հայտնել էր, որ կողմերը կարծիքներ են փոխանակել տարածաշրջանում տրանսպորտային և տարանցիկ խնդիրների շուրջ և ընդգծել Ռուսաստանի, Ադրբեջանի և Իրանի տարածքով անցնող «Հյուսիս-Հարավ» տրանսպորտային միջանցքի ներուժի ընդլայնման կարևորությունը։
Էմմա Չոբանյան
