31.05.2026 | 15:02
Խորհրդարանը պետք է ձևավորվի այնպես, որ ոչ մի ուժ չունենա 50+1 ձայն․ Մարուքյան․ ՏԵՍԱՆՅՈւԹ
Ազատ մամուլը էական է ժողովրդավարության համար․ ԱՄՆ-ն արձագանքել է Թուրքիայում DW և «Ամերիկայի ձայնը» լրատվականների կայքերի արգելափակմանը
Քաղաքականություն
07.07.2022 | 23:13
ԱՄՆ-ն արձագանքել է Թուրքիայում DW և «Ամերիկայի ձայնը» լրատվամիջոցների կայքերի արգելափակմանը։ Մասնավորապես, ԱՄՆ Պետքարտուղարության մամուլի խոսնակ Նեդ Փրայսը թվիթերյան իր էջում գրել է, որ ցավում են նման որոշման համար։
«Մենք ցավում ենք Թուրքիայի Ռադիոյի և հեռուստատեսության բարձրագույն խորհրդի՝ DW-ի և «Ամերիկայի ձայնի» կայքերի արգելափակման որոշման համար, որն է՛լ ավելի է ուժեղացնում կառավարության հսկողությունը Թուրքիայում խոսքի ազատության և լրատվամիջոցների ազատության նկատմամբ։ Ազատ մամուլն էական նշանակություն ունի ամուր ժողովրդավարության համար»,- գրել է Փրայսը։
Հիշեցնենք, որ օրերս Թուրքիայում արգելափակվել էին երկու լրատվամիջոցների կայքերը։ Համապատասխան որոշումը կայացրել է Անկարայի դատարանը, ինչի մասին հայտնել է Թուրքիայի Ռադիոյի և հեռուստատեսության բարձրագույն խորհրդի (RTÜK) ներկայացուցիչը։ Դեռևս մի քանի ամիս առաջ RTÜK-ը արտասահմանյան հեռարձակողներից պահանջել էր դիմում ներկայացնել՝ ինտերնետ հեռարձակման լիցենզիա ստանալու համար։ Ըստ լրատվականների՝ նման քայլը «թույլ կտա Թուրքիայի կառավարությանը գրաքննել խմբագրական բովանդակությունը», ինչն «անընդունելի կլինի անկախ լրատվամիջոցների համար»:
Էմմա Չոբանյան
