Քննիչը կոծկել է իրեղեն ապացույցներն ու տարիներ անց նշանակվել դատավոր․ զինվորի մայր․ ՏԵՍԱՆՅՈՒԹ

Խորհրդատվական եզրակացությունը վարչապետի կողմից հատուկ գրությամբ ուղարկվել է Գլխավոր դատախազություն: Դրանից հետո պետք է նախաքննություն մեկնարկեր: «Խաղաղ պայմաններում զոհված զինծառայողների գործերը շարունակում են մնալ առկախված» թեմայով քննարկման ժամանակ այս մասին նշեց ոչ մարտական պայմաններում մահացած զինծառայող Տիգրան Օհանջանյանի մայրը՝ Գոհար Օհանջանյանը:

Նա նշեց, որ խորհրդատվական եզրակացությունն ստացել է անցյալ տարվա մայիսի 11-ին և հետևողականորեն հետևել է, թե ինչ քայլեր են ձեռնարկվում:

«Հունվարին կապ հաստատեցի գործող քննիչ Գոռ Թադևոսյանի հետ, արդեն ծանոթացել էր գործին, մեզ հրավիրեց Քննչական կոմիտե, և այդտեղից սկսվեց նախաքննությունը:

15 տարվա ընթացքում չի հարցաքննվել Հայկազ Բաղմանյանը, բայց դեպքը կատարվել է հենց նրա թիկնապահների սենյակի պատուհանի տակ:

2012թ. հարցաքննել էին Բաղմանյանի թիկնապահներին, որն արդյունք չէր տվել: Նրանց ցուցմունքների մասին մենք չենք տեղեկացել, քննչական մարմինները թաքցնում էին, թե նրանք ինչ են ասել:

Այս հանձնաժողովի կողմից գործը վերանայելու ընթացքում շատ բաներ ի հայտ եկան, նաև այն, թե ինչ է բացահայտվել թիկնապահներին հարցաքննելու արդյունքում:

Պարզվեց, որ այսքան տարիների ընթացքում միակողմանի քննություն է իրականցավել, մեղադրյալներն արդարացվել են:

Այս քննության արդյունքում նաև պարզ դարձավ, որ ռադիոռելային կայանը  չի կարող հոսանք արտադրել, որ մադու կյանքին վտանգ սպառնա ու մահ գրանցվի…

Կատարվել է հանցագործություն, բայց 15 տարի գործը չի փակվել,  տարիների ընթացքում սխալ, միակողմանի քննություն է իրականացվել:

Թե առաջին քննիչն ինչ հանցագործություններ է կատարել, դա պարզ է բոլորին, գործը չի բացահայտվել: Իսկ երկրորդ քննիչը՝ Արտակը Կրկյաշարյանը Տիգրան Օհանջանյանի գործով իրեղեն ապացույցները կոծկել է, փչացրել է, և հիմա՝ 15 տարի հետո նրան նշանակել են Վճռաբեկ դատարանի հակակոռուպցիոն պալատի դատավոր… Այսինքն՝ սրանից հետո էլ նա նույն ձևով պիտի շարունակի՞ դատարաներում վճիռ կայացնել»,- նշեց Օհանջանյանը:

Մանրամասները՝ տեսանյութում: