Քաղաքականություն
03.06.2022 | 21:17Ընդդիմությունն այսօր վերադարձավ խորհրդարան՝ Ադրբեջանի և Թուրքիայի հետ հարաբերությունների վերաբերյալ հայտարարության տեքստ ընդունելու օրակարգով։ Այն, որ իշխանությունը բոյկոտեց նիստը, հիմք է տվել ընդդիմադիրներին տալ այսպիսի գնահատական․ «Չմասնակցելով և տապալելով նիստը՝ փաստվում է, որ իշխանությանը չի հետաքրքրում պետության անվտանգության օրակարգը»։
Ինչո՞ւ է կառավարող ուժը խուսափում ընդունել հայտարարություն, որում կասվի, որ Արցախը չի կարող լինել Ադրբեջանի կազմում, այսինքն՝ կարմիր գծեր չի սահմանում։ Քրիստոնեա-ժողովրդավարական կուսակցության ղեկավար Լևոն Շիրինյանը փողոցում գտնվող ուժերին ոչ թե ընդդիմություն է կոչում, այլ «ռադիկալ ռևանշիստական» ուժեր․ «Նրանց պորտալարը ռուսական իրականության մեջ է, Հայաստանում՝ գողապետության։ Հետևապես, ճշգրիտ չէ իրենց ընդդիմություն անվանել, հանրությանը մոլորեցնել է դա»։
Ըստ նրա՝ փողոցի շարժման նպատակը տապալելն է Հայաստանի քաղաքականության տարածաշրջանային ձևաչափը, ինչը Ռուսաստանը չի ուզում։
«Հայաստանի տարածաշրջանային քաղաքականությունը մեզ, ի վերջո, դուրս է բերում մեր ազգային շահերն իրականացնելու հնարավորության վրա։ Դա իրենք չեն ուզում, որովհետև այդ հարթակը տեղափոխվում է արևմտյան ժողովրդավարական ընկալումների շրջանակ, իսկ այստեղ իրենք դատվելու են։ Այստեղ Մոսկվա փախչելու տեղ չկա՝ իրենց գողացածն էլ հետները տանելով։ Երբ օրենքը գործում է՝ ինչպես ԱՄՆ-ում, մաֆիան չի կարող երկրի տեր ու տնօրենը լինել։ Գողապետություն կա, բայց այն շատ է խորքը գնում, որովհետև օրենքին և իրավապահ համակարգին է բախվելու»,- ասում է Լևոն Շիրինյանը։
Նա կարծում է, որ ՀՀ-ի ներքաղաքական պրոցեսները կապված են ուկրաինական պատերազմի հետ, ուր «Ռուսաստանը ստացել է «Աֆղանստան-2»։ Բայց նախկին հզորությունը, ըստ քաղաքագետի, Ռուսաստանն այլևս չունի․ «Որպեսզի այստեղ ինչպես պատերազմը կազմակերպեց Արցախում թուրքերի ձեռքով մեր դեմ և տեղավորվեց Ստեփանակերտում, հիմա ինքն այս հակահայ աշխատանքը ինչպես նա էր, իրականացնում է իր 5-րդ շարասյան միջոցով»։
Լևոն Շիրինյանը վստահ է, որ Ռոբերտ Քոչարյանը, Սերժ Սարգսյանն այլևս չեն կարող վերադառնալ իշխանության․ «Նրանց վերադառնալը մեկ պայման ունի, եթե ՌԴ-ն իր զորքով արյան բաղնիքներ սարքի այստեղ, սրանց բերի, դա էլ բացառված է, ուրիշ կերպ չեն կարող»։
Հարցազրույցն ամբողջությամբ՝ տեսանյութում։
Ռոբերտ Անանյան
