Փաշինյա՞նն է որոշում Արցախը տալ-չտալ․ ընդդիմությունը թող Մոսկվայում ցույցեր անի՝ ռուսներն են անվտանգություն ապահովում․ Արեգ Քոչինյան․ ՏԵՍԱՆՅՈՒԹ

Factor TV–ի հարցազրույցը քաղաքագետ, պատմաբան Արեգ Քոչինյանի հետ

-Առաջիկա օրերին հայ-ադրբեջանական սահմանին հանդիպելու են սահմանազատման հանձնաժողովի անդամները: Հետաքրքիր է՝ ինչո՞ւ սահմանին և ոչ, օրինակ, Մոսկվայում, Բրյուսելում կամ Թբիլիսիում: Հայկական կողմից Մհեր Գրիգորյանն է գլխավորում հանձնաժողովը: Հայ պաշտոնյաների խոսքով՝ անհամաձայնություններ կային հանձնաժողովի հանդիպման վայրի, օրի հետ կապված: Սա ի՞նչ նրբերանգ է այս գործընթացում։

-Ինչո՞ւ սահմանին. կարծում եմ՝ մի քանի փաստարկ կա, առաջինը՝ սահմանին նման ներկայացվածությամբ պատվիրակությունը, այսինքն՝ երբ փոխվարչապետները հանդիպում են հայ-ադրբեջանական սահմանին, դա ինքնին որոշակի դեէսկալացիայի տարր է պարունակում (ի դեպ՝ նման հանդիպում շատ վաղուց չի եղել): Երկրորդ՝ ինչի հետ էր կապված այդ անորոշությունը՝ որտեղ կլիներ հանդիպումը, եթե չլիներ սահմանին, կարծում եմ՝ դա պայմանավորված է երկու զուգահեռ փաստարկների գոյությամբ: Բավականին հետաքրքիր փաստ է, որ գոյություն ունեն բանակցությունների առանձին բրյուսելյան հարթակ և մոսկովյան հարթակ, որոնք որևէ կերպ միմյանց չեն փոխլրացնում, չեն շարունակում, կարծես միմյանցից կտրված, առանձին իրականություններում գործող ձևաչափեր են:

-Խանգարո՞ւմ են իրար:

-Անխուսափելիորեն մենք գալու ենք ինչ-որ կետի, երբ խանգարելու են իրար, որովհետև սրանք երկու տարբեր աշխարհաքաղաքական նպատակներ հետապնդող հարթակներ են, որոնք գործում են զուգահեռ: Լավագույն տարբերակում սրանք կսկսեն տորբեդահարել, սառեցնել բանակցային գործընթացը։ Երկու հարթակներում էլ նմանատիպ որոշումներ են կայացվում և երկուսն էլ սպասարկելն անտրամաբանական է դառնում: Երկու հարթակների առկայությունը, անխոս, վնասում է բանակցային գործընթացը և սա ոչ միայն բանակցությունների սառեցման վտանգ է, այլ նաև էսկալացիայի: Սա շատ լուրջ մարտահրավեր է:

Հարցազրույցն ամբողջությամբ՝ տեսանյութում:

Ռոբերտ Անանյան