Հայաստանում 400 հազար դրամ ստացող ուսուցիչ կա՞. ատեստավորման ընձեռած հնարավորություններն ու ռիսկերը․ ՏԵՍԱՆՅՈՒԹ

Որքա՞ն է իրականում բարձրանում կամավոր ատեստավորում անցած ուսուցիչների աշխատավարձը․ այս հարցը վերջին օրերին տարատեսակ մեկնաբանությունների առիթ է տվել մանկավարժների շրջանում։

Կամավոր ատեստավորման արդյունքում 70 և ավելի տոկոս արդյունք ցուցաբերած ուսուցիչների դրույքաչափը սահմանվել է 200.000 դրամ՝ մեկ դրույք զբաղվածության համար։ Կառավարության որոշման համաձայն՝ կախված արդյունքից՝ նախատեսվում է 30-50 տոկոս հավելավճար։ Նախորդ տարի կամավոր ատեստավորում անցած ուսուցիչների 74 տոկոսը՝ 478 հոգի, մայիսի 1-ից արդեն կստանա հավելավճար։

«Փաստացի ստացվում է, որ որևէ ուսուցիչ, որի դրույքաչափը փոխվում է, արդեն իսկ ունի նվազագույնը 30 տոկոս հավելվաճար, որը 60 հազար դրամ է մեկ դրույքի պարագայում։ Հետևաբար, 1 դրույք զբաղվածությամբ ուսուցչի նվազագույն աշխատավարձը, կամավոր ատեստավորումը 70-79 տոկոս արդյունքով անցնելու պարագայում, կլինի 260 հազար դրամ»,- ասում է ԿԳՄՍ նախարարի տեղակալ Ժաննա Անդրեասյանը:

Արդեն մի քանի օր է՝ բուռն կերպով քննարկվում է ԿԳՄՍ նախարար Վահրամ Դումանյանի՝ այս թեմայով ավելի վաղ Կառավարության նիստում արած հայտարարությունն այն մասին, որ ուսուցիչների աշխատավարձը կարող է հասնել մինչև 400 հազար դրամի։

Կրթության փորձագետ Սերոբ Խաչատրյանի տվյալներով՝ մինչ այս պահն այդպիսի ցուցանիշ արձանագրող դեռևս չի եղել։

«Այս պահի դրությամբ՝ Հայաստանում չկա գեթ մեկ ուսուցիչ, որը կստանա այդ 400 հազարը։ Չկա բարձր տարակարգ ունեցող և ատեստավորումը շատ բարձր ստացած ուսուցիչ։ Բայց, իհարկե, դա հնարավորություն է, և ենթադրում ենք, որ առաջիկայում կլինեն այդպիսիք։ Խնդիրներից մեկն էլ այն է, որ նախարարությունը մեծ կարևորություն է տալիս կամավոր ատեստավորմանը, մինչդեռ դասավանդման պրոցեսում միայն առարկայի իմացությունը չէ կարևորը, այլև մանկավարժական հմտությունը»,- շեշտում է կրթության փորձագետ Սերոբ Խաչատրյանը։

Որոշ ուսուցիչներ, որոնք չեն անցել կամավոր ատեստավորում, այն համոզման են, որ գիտելիքներից բացի՝ պետք է գնահատվեն նաև ուսուցչի տարիների փորձը, դպրոցի տնօրինության, ուսուցիչների և աշակերտների կարծիքը։ Բացի այդ, հնչում են այլ դժգոհություններ ևս։

«Երբ ատեստավորման շրջանակում, օրինակ, աշխարհագրության թեստերում դրվում է տասը խնդիր՝ բարձրագույն մաթեմատիկայից, և աշխարհագրության ուսուցիչը դա չի լուծում ու զրկվում է բարձր աշխատավարձից, կարծում եմ՝ արդար չէ»,- ասում է թիվ 114 ավագ դպրոցի աշխարհագրության ուսուցչուհի Մարգարիտա Մխիթարյանը:

2022 թվականին ատեստավորումն իրականացվում է 5-12-րդ դասարաններում բոլոր առարկաները դասավանդող ուսուցիչների համար, 2023-ից սկսած՝ 1-12-րդ դասարաններում դասավանդող բոլոր ուսուցիչների համար։

Մանրամասները՝ տեսանյութում:

Աննա Բաբաջանյան