30.10.2026 | 23:30
Հայաստանի մի շարք հասցեներում էլեկտրաէներգիայի անջատումներ կլինեն
Մերցը Նեթանյահուի հետ է հանդիպել
Քաղաքականություն
07.12.2025 | 15:56
Գերմանիայի Դաշնային Հանրապետության կանցլեր Ֆրիդրիխ Մերցը Իսրայել իր առաջին այցի ընթացքում հանդիպել է Իսրայելի վարչապետ Բինյամին Նեթանյահուի հետ նրա Երուսաղեմի նստավայրում։ Կողմերը նախատեսել էին քննարկել տարածաշրջանում պահպանվող լարվածությունը և երկկողմ հարաբերությունների վիճակը, հայտնում է DW-ն։
Մերցը, ժամանելով Իսրայել նախորդ երեկոյան, վստահեցրել էր, որ Գերմանիան շարունակելու է աջակցել Իսրայելին։ Նա ընդգծել էր, որ Իսրայելի աջակցությունը մնում է «Գերմանիայի դաշնային հանրապետության քաղաքականության անփոփոխ հիմնարար բազան»։
Կանցլերը հայտնել է, որ Նեթանյահուի հետ հանդիպմանը մտադիր է պաշտպանել Մերձավոր Արևելքի կարգավորման «երկու անկախ պետությունների»՝ իսրայելական և պաղեստինյան, խաղաղ համատեղ գոյակցության սկզբունքի իրականացումը։ Բացի այդ, նա նախատեսում էր կոչ անել Իսրայելին բարելավել Գազայի հատվածի բնակիչներին տրամադրվող հումանիտար օգնությունը։
Նեթանյահուի հետ հանդիպումից առաջ Ֆրիդրիխ Մերցը այցելել է Երուսաղեմի Յադ Վաշեմ Հոլոքոստի հուշահամալիրը և այնտեղ վերահաստատել Գերմանիայի երկարաժամկետ պատասխանատվությունը Իսրայելի հանդեպ։
«Այստեղ՝ Յադ Վաշեմում, հատկապես զգացվում է այն անփոփոխ պատմական պատասխանատվությունը, որը կրում է Գերմանիան։ Գերմանիան պետք է պաշտպանի Իսրայելի գոյությունն ու անվտանգությունը։ Դա մեր հարաբերությունների անփոփոխ հիմքն է՝ հավիտյանս»,- գրել է Մերցը՝ այցելուների գրքում։
Նեթանյահուի հետ բանակցություններից հետո Մերցը նախատեսում է հանդիպել ՀԱՄԱՍ-ի կողմից գերեվարված նախկին պատանդների, ինչպես նաև սպանված պատանդների հարազատների հետ։
