Երկրում ֆորս-մաժորային իրավիճակների դեպքում ընդերքօգտագործողները պայմանագրի ժամկետի առումով կարող են արտոնություն ստանալ. նոր նախագիծ

Կառավարությունն առաջարկում է փոփոխություն իրականացնել ՀՀ ընդերքի մասին օրենքում, կարգավորել ընդերքօգտագործման իրավունքի փոխանցման և անհաղթահարելի ուժի առաջացման հետևանքով ընդերքօգտագործման իրավունքի ժամկետի երկարաձգման հետ կապված իրավահարաբերությունները: Այս թեմայով այսօր քննարկում ծավալվեց ԱԺ տնտեսական հարցերի հանձնաժողովում։ Անհաղթահարելի ուժ են համարվում հրդեհները, ջրհեղեղները, երկրաշարժերը, փոթորիկները կամ այլ բնական աղետները, ինչպես նաև՝ պայթյունները, պատերազմը, ահաբեկչությունը, քաղաքացիական պատերազմը, քաղաքացիական զանգվածային անհնազանդությունը, որոնք ընդերքօգտագործողը չէր կարող կանխատեսել, կանխարգելել և որոնց հետևանքով ընդերքօգտագործողը չի կատարել կամ ոչ պատշաճ է կատարել պարտավորությունները: Այս մասին նիստում նշեց ՀՀ տարածքային կառավարման և ենթակառուցվածքների նախարարի տեղակալ Հովհաննես Հարությունյանը:

«Անհաղթահարելի ուժի առաջացման դեպքում իրավունքի ժամկետները երկարաձգվում են առավելագույնն այդ հանգամանքների գործողության ժամկետով, ինչը հնարավորություն է տալու ընկերություններին պատշաճ կատարել այն պարտավորությունները, որոնք չէին կատարվել աշխարհում և ՀՀ-ում վերջին տարիներին ստեղծված անկանխատեսելի և արտակարգ պայմաններում»,-ասաց նա:

Փոխնախարարը շեշտեց՝ սա ներդրողների համար կապահովի գործունեություն կազմակերպելու կանխատեսելիությունը, կբարձրացնի ներդրումային գրավչությունը:

Նիստից հետո Factor TV-ի հետ զրույցում փոխնախարարն ասաց, որ նախագծի ընդունման դեպքում ընդերքօգտագործմամբ զբաղվող տնտեսվարողները ֆորս-մաժորային իրավիճակների դեպքում պայմանագրի ժամկետի առումով արտոնություն կստանան։ Օրենքի նախագծով ընդերքօգտագործման իրավունքի փոխանցման առնչությամբ ընկերություններին առաջարկվում է նաև դիմում ներկայացնել լիազոր մարմին, որն էլ պարզելու է փոխանցման հետ կապված հարցերը: Կարգավորվելու են նաև ընդերքաբանական փորձաքննության ներկայացվող նյութերին առնչվող իրավահարաբերությունները:
Նշենք, որ նախագիծը հանձնաժողովում դրական եզրակացություն ստացավ։

Մերի Մարտիրոսյան