Ղրղզստանում ձերբակալել են Հրանտ Դինքի սպանության գործով ամբաստանյալներից մեկին և արտահանձնել Թուրքիային

Թուրքիայի Անվտանգության գլխավոր վարչությունը հայտարարել է, որ Ահմեթ Իսկենդերը, որը պոլսահայ լրագրող Հրանտ Դինքի սպանության գործով դերակատար է, ձերբակալվել է Ղրղզստանում ու արտահանձնվել Թուրքիա, գրում է Bianet-ը։

Տարածված հաղորդագրությունում նշվում է, որ պարզվել է՝ Ահմեթ Իսկանդերը թաքցրել է Հրանտ Դինքի սպանության ժամանակ օգտագործված զենքը, գումար է տվել սպանությունն իրականացնողին և նրա հեռախոսն օգտագործել է որպես կապի միջոց սպանության համար։ Նա կալանավորվել է։

Հաղորդվում է, որ մեղադրյալը հայտնաբերվել է Ղրղզստանի մայրաքաղաք Բիշքեկում։ Իսկենդերը Ղրղզստանի անվտանգության ուժերի կողմից ձերբակալվել է 2022 թվականի փետրվարի 26-ին։

Հավելենք, որ 2007 թվականի հունվարի 19-ին սպանված լրագրող Հրանտ Դինքի գործով դատավարության ընթացքում Ստամբուլի 14-րդ քրեական դատարանը 2012 թվականի հունվարի 17-ին վճռել էր, որ Ահմեթ Իսկենդերը, որը մյուս մեղադրյալների հետ միասին ձերբակալվել էր 2007 թվականի հունվարի 24-ին, պետք է դատապարտվի 12 տարի 6 ամիս ազատազրկման՝ «դիտավորյալ սպանությանն օժանդակելու» մեղադրանքով։

Դատարանի կոլեգիան ինը ամբաստանյալների վերաբերյալ որոշում է կայացրել 2019 թվականի հուլիսի 17-ին՝ վճռելով, որ յոթ ամբաստանյալներ պետք է պատժվեն։ Նրանցից Ահմեթ Իսկենդերը դատապարտվել է 1 տարի 10 ամիս 15 օր ժամկետով ազատազրկման։ Մինչ Ահմեթ Իսկենդերի ազատազրկման որոշումը կայացնելը պարզվել է, որ նա փախել է երկրից։

Էմմա Չոբանյան